31st May 2022 | Kanam Vaiphei
ZILLAI DAY
Presidential Address
NAM KHANTONA DING IN NAM A DAM A NGAI HI.
Zillai Kum 83 tinna mel muthei ding ah ei puitu chung Pathian min in, mun tin ah Zillai te leh nu leh pate zosia, chuleh lawkpi ding bangma umlo na, sepgim leh achang ah gensiat le tuak ding khawksa lo ah, nam ngainat na zal ah Zillai puitu ding ah hung kipan dawk , Zillai Districts, Zillai blocks, Zillai Branch, leh Zillai Unit puitu, ka seppi dawi um leh suan um tak te, la bawn un ka zana Zillai Chibai ka hun buk a hi.
Zillai te hi Pathian in umzia nei tak leh I gam ah chamna leh khantona Tut tu hi ding leh mawpuakna liantak la tozel ding ah a la guan a hi ti ka genlang ut a hi,
Zillai hi Southern Manipur ah students union um masapen leh Manipur pumpi a ding ah a panina a hibep hilo in, Pathian in I gam ah Lekha lam thiamzilna (Western Education) pawlut ding in i Zillai masapen tegel u, Pu Thangkhai leh Pu Lungpau te a la ko a hi,
Amau tegel mangcha in I gam ah Lekha zilna a hung kipan ah, zia bep chu hilo in Southern Manipur ah A cha masapen hi ding leh I gam damna ding chamna thupha thaumeivak pawlut tu hi ding in Pathian in lawichan tegel chu a la ko masa pen kit a hi.
Tuni hun ah zillai te hin, i putegel u sulnung hi bang gual in i zui nau em? Chuleh a nasepna mabak u, thiamzilna lam bep hilo ah, gam leh mipi a ding ah, thaumeivak, nam damna ding chanchinpha a la kalsuanpi teu hi, khangthak te hin bang gual ah semto ding in i ki singsau em ? ti hi tuchung I Zillai Day mat nau tawh kitawn ah I lim-et ding u hi leh ka dawi ma ma a hi.
Sum leh pai, nei leh go sang in nam damna a mantam zaw, nam a dam chun thildang zosia chule piak belap ah ki um thei a hi. insung nawpna ding in insung a dam angai ah, insung khantona ding in i insung a dam a ngai a hi. Nam kithu tuak leh namsung dam ah lemna phatak ah neite chu Pathian in le chawisang ngei ding a hi.
I nam damna ding leh khangto zelna ding a hin Zillaite haw i bawn un mawpuakna I nei chiat ua, i bawlthei dan kibang puan tin, i sep thei dan le kibang puan ah, a hinla, i umna mun chiat leh i sepna mun chiat ah, mi pachat lawdawk thei ding ah gunchu tak leh thudik tak ah panlak hi, i nam i chawisang thei nau a hi. Chuleh nam a ding ah bangma phachuam bawl dawk theilo i um khak tak in le nam su minsia tu hi lo ham ham gua chiat leu hin, i nam a ding ah damna leh khantona khat hung hingei ding a hi.
Thiamzilna leh Chamna chanchinpha mapuitu ding ah Pathian in i pupa te a latel daw hi, tuhun ah Zillai ten kisuanpi bep hilo ah, a nung u zui ah, a sepban u I mazawn chiat ua sem to ah, Zillai sakmin hi namtin leh zu leh va zosian le a hun sak theina ding ua panlak ding hi i mawpuaknau i liangko ua Kinga a hi.
Zia ding a chun thei patawp in pang chiat hitiu.
Zillai damsawt hen.
Pauneihlal Haulai
President
Zillai (Vaiphei Students’ Association) GHQ
