24th Sept 2024 | Kanam Vaiphei
V. Soilemthang Vaiphei, IPS, 2023 batch, Assam-Meghalaya Cadre,Lamka, Sept. 22 (Nisin Thuhiltu):
UPSC Civil Services Exam 2022-2023 ah lawtingna chang leh Indian Police Service (IPS) mu Mr. Vincent Soilemthang Vaiphei (27) in tunaicha a khah Sardar Vallabhbhai Patel National Police Academy (SVPNPA), Hyderabad, Telangana in training a zo hi.
2023 batch, Assam-Meghalaya Cadre piak in a um a, September 20, 2024 ah 76th batch of Regular Recruits (76RR), Indian Police Service (IPS) probationers, Passing Out Parade bawlte lak ah khat ahi. Passing Out Parade a neizaw tak uh tawh kitawn in, mun chuamchuam ah Exposure Visit ah sawl ahiu a, tu leh tu in India leh Pakistan border area, Jammu and Kashmir ah Exposure Visit bawl hiu ah hiat ahi.
Ama’n a genna achun, mun chuamchuam ah Exposure Visit a bawl hun sung ua, security forces, intelligence, counter-insurgency leh lam chuamchuam ah security te nasep thil bawlna banggual ahi em ti a hiatthiamna ding ua panla ding ahidan uh a gen a, zia zaw tak chuleh Assam ah District khat penpen ah first posting ding hi’n a gen hi.
IPS zik dawk leh Passing Out Parade neizo theita ah a umna chung in, a tawsawt leh a poimaw dungzui ah a la panpi zosia te chung in kipakthu a gen hi.
A lawtinna thuguk a genna achun, tup gilna a nei ziak ah lawting hipen in a gen hi.
IPS a zik dawna ding ah haksatna a tuak dante a genna achun, insung ah sum leh pai haksatna’n sulung zi’ng mama sek ahidan gen in, a pa (father) mission field ah caretaker pension sum Rs 4000-5000 tawh kichawm ahi dungzui ua, lungkiakna tamtak umsek leh nu-leh-pa te haksatna a ngaitua takle, lungzi’ng mama ah umsek ahidan a gen hi. Ama lekha simna chawpna ding ah a nu-leh-pa’n second hand van (clothes) zuak ahidan uh le a gen hi. Zialo achu, Civil Services exam ah societal pressures le sang mama sek ahi dan gen in, mipi kineppi gual ah lawting zo lo ah a um khak hunte ah kingaisiat umsa leh kisuanla umsa mama sek in a gen hi. Zia ah haksatna a tuakto te chu alangkhatlam in a lawtinna ding ah panpitu hi in a gen hi.
UPSC Civil Services exam ding ah a kisingsakdan leh a panlakdan a genna achun, Coaching la khalo, ama mimal ah kitodel leh online ah study material a poimaw te chawmkhawm zel a, hiatthiamlo khenkhat a neite UPSC Civil Services exam ah ala lawting masa thudawt theithei thudawt zel ahidan a gen hi.
UPSC Civil Services exam ah First Attempt in kum 2020 a khah Prelim tiang in lawtinna a la chang a, himaleh Main exam in a la lawsam hi. UPSC Civil Services exam 2022-2023 ah Prelim + Mains + Personality Tests (Interviews) ah lawting in, Rank 619 (AIR) ah pang ahi.
Vincent in, Jubilee Model High School, Jonai ah kum 2013-2014 in pawl 10 a zo a, Jonai Science College, Jonai, Science ah kum 2014-2016 in pawl 12 a zo hi. Kum 2016-2019 in Cotton College, Guwahati apat in Zoology (Honours) in graduation a zo hi.
Vincent hi, Upa Khuplal Vaiphei leh Kalpana Vaiphei of Jonai, Dhemaji, Assam (Permanent Address – Gangpimual, Churachandpur, Manipur) te gochan chanu khat (1) leh chapa pathum (3) lak ah a neupen ahi.
Hiatthei khat chu, Mr. Vincent Soilemthang Vaiphei pianpi a U (elder brother) Henry Manglalpui le tu leh tu CRPF, Sub-Inspector (SI) ah training bawl zinglai ahi.
