“LA INNSUNG SUTUP TAN”. Tihi i thumasa’n vak mang hitiu. Innsung suktup na ding in kalbi masapen chuh innsung ah nu leh pa mawpawh tute Lalpa Pathian ah kingâk zing hih ahi. # Ziahban ah chun sungkhat kihouthei tak ah hing khawm dial dial hih kalbih panina chuh ahi.
# Ziahzawh achun, kalbi pathumna chuh Lalpa Pathian apat malzawlna i dawnna ding uh chuh ahi.
Amasa pen in ziah gual innkuan apat chun gam leh nam sung tiang ah kihoutheina te hung piang ding ahi.
Mihingte hi sukkhial, bawlkhial, genkhial nate a umlo thei puai, himaleh…..
Upate’n, “Lêi leh Haabawn a kipetsek nau in”. Maleh apang khawm kik paihngal ziang sek uh a hiu. Ziah gual achun, Lalpa Pathian min ah ih vak kih ngaidam tuah zel ding uh ahi.
Ziachuh ei gingtute bawlzing ding thilpha chuh ahi. “Thilpha bawl chimchaklo ding”, ti, I Bible in ei gen ahi, ziaziak achun ei ma innsung chiat ah thilpha bawl in panlah thei zing chiat leu hin gam leh namsung inle kihoutheina chuleh kichamna chuh um maiding ahi.
Awle, tulai khawvel tualgaal ziak ah beidawn, lungkham, genthei haksa tak I tuakna chung un i lunggel/khawsak danteu hinle phatlam manawh sangin siatna lam mahnawh deu deu gual in a kilang ziang ta, dah um tak chuh ahi mai tah e. I Khristian hindan phatak i matsuah khak mai diu hih a khawk pentak chuh ahi tah hilam !
Ziaziak achun kihepina, kilungsiatna leh kihoutheina chuleh kicham nawpna lungthim te hih daihiai hiai in malai pi leh pute khang abang tapuan, a mangthai ding kuan, mitthak kisiah chuleh pengpelep te nupan chungnun kichû te gual mai bep ihikhak diu atizat um khawp mai hi. Mihing lunggil a lungnatna tawpkhawk/thangtawmna tungziang sek maleh lungnat, thinnatna te kisumham ham in, uputen, “chillûm vâlthak phawt di”, atigual un, dipchung a hatlak sang in, taigil a hatlâ theilo ah, Khangtou ilah kisak lai un akhangsuk zawk ihih khak diu hih thil dah um leh lau umpen chuh ahi.
Tulai khawvel ahin unau, kihouthei tak muding avang ma ma tah abang hi. Aziak chuh Innsung kikhenlou dinglai, innsung kikhennate, khua/veng innsak innthang kilem nuamlou in, ho leh biak, phung leh chaang ah kibung khen lemlum nate, mani masial in eima lawkna ding ahi poule ; siamtu, chung Pathian ziangle lau talou, kua ahem…? Tulai khawvel ah mihiamte lak hin aum ngeih i gingcha ahi….!
Ziah gual khawhetna phalo tak, chingtu/neitu ipan khak maitâk uh hi Pathian apat malzawlna bangtin imu’n/ idawng ta diam uhleh…..?
I KIHOUTHEILO NATEU:
1. Innsung khat ziangle kihoutheilou ziak’in, kitimatna umthei talou in, ki gâl et tuah gial gual in haksat gentheina malzin gual in ih innsung in ahung tung tahilo maw !
2. Khua/Veng sung kihoutheilou ziak’in kipumkhatna a umthei tapuah, khuatang/kochuam chuleh namsung vaihawmna phatak, um thei talo in i khandih gual tak’in le a kikhangtou thei ta puai.
3. Namsung kihoutheilou ziak’in mite tawden/musit nam ah kichang in, mani kipilsak, pilna dik lunggel gel i um tah puau in nampi liangvaina atut ban in vaihawmtute lungzin gentheina atut hi.
4. Khangmasa, Pu leh pate khang ah ala kihiat khialnau leh asukkhial nateu milthei lo in, tu khang tiang tiang ah i thipi thei lo ziak un….!
5. Sungkuan khat, ankuang sawkkhawm zing kihinapi’n, kihoutheilo ziak’in, kih ki innkhen lemlum in Lalpa Pathian apat malzawlna dawng tâk innkuan, khua leh tui chuleh nam a ki um thei tahngaih puai.
U LEH NAU KIHOUTHEI NA DING IN:
Ahile, unau kihouthei dial dial ah chenkhawm ding hih lung in la lagel kha ngaihim him sek em ? Ngaituahveng veng tia, mihing lamkai ah la et laisiah chuh mitawh kicham/kihoutheina hih um theilou him him ding ahi. Himaleh Lalpa i Pathian lam enzingtute chuh mitawh kihoutheilou/kicham nuamlou a um ngaih puau hii.
Unau, kihouthei na ding, chuleh gam leh nam damna ding ngaituah ah, haksat genthei thuak ah lungthim, thah leh zung chuleh mitthitui te hun seng ah Lalpa kengbul ah kingaitawm tak ah nang leh kei phatna ding eila khawk sakma ma, sakhua lam I hotute gim leh chawlna te hih athawn mai chang kihenla, kimuda chuleh kinak khang tawpsan/haisan chiat in, khang vangpha, nam vangpha hisak guachiat taitiu e.
Ichih leh inam adin awle !
Chun, pung (watch) kitihih mizosia ah a kituak suak diak puai maleh a bûttu/anêitu ten Radio hun (time) tawh azuk hêktuak chiat uhleh a hung kituak suak mai hi.
Ziahgual achun, Lalpa Pathian ah kingah chiat in innsung, khua/veng sung chuleh namsung kituak taka kihoutheina ding chuh nang leh kei mawpuak/lunggel ah um ahin, amasa pen in gitlo ngaidam thupha kichawi tuah zingthei leu hin Lalpa’n malzawlna a piak kumtuang ah hinna ding KIHOUTHEINA chuh i innsung, khuasung, kochuamsung leh namsung ahin tulai tak ah ima maw pen tak uh hilou ding ahem ?
U leh naute haw, kihouthei dial dial a chenkhawm ding guachiat tai tiu in, taksa leh thagau ah I gaaldo nau ahin gaalzo ngeih ding in kipumkhat tak’in i khristian nu’n siamthak kik hitiu.
Chun i nam uh mite musit himaleh chawisang ding in kipumkhat na tudet zing hitiu aw…..!
“Pankhawm leh sepkhawm a zang in, nekkhawm atui in, mihingte hih takhawm bualkhawm, semkhawm ding ah Pathian ei siam ihiu ahi”.
Saa leh gaal ziak’in Innkuan, khua leh tui chuleh namkhat te ei khen ziang kihen.
Ngaitiah, unau, tu’nle dogaal nei ihih ziak un kihouthei tak ah i dokhawmlo uh chun Lalpa ilam ua a hung panlo ahileh I dogaal uhi zo zolo khat in um khaitin’uh, gaalte nawchimit hunghih ziang thei nalai lai ihiu hi.
Ziaziak achun nâng uh, kêi uh tihi ilak un umdah henla, laigui khaukhat kizawm, suapi khat ihiu hi, i kal’un Lalpa i Pathian dingzing henla, a malzawlna dawng tak mihing khat/namkhat hi guah chiat’in, kihouthei tak ah taksa leh thagau lam ah I gaal uhi dozo ngeih ngei ding in pan lathak kik hitiu e !
CHANGTEL:
“NGAITIA, UNAU KIHOUTHEI TAK AH CHENKHAWM DIAL DIAL HIH A NUAM IN, APHA NA LAWM LAWM E…!
LUCHANG AH SATHAU MANPHA TAK KINUH, ARON KHAMUL AH LUANG SUK, A PUA’NAK CHUAL MAWNG TIANG AH LUANG GUAL AHI.
ZIAH CHUH HERMON DAICHIM ZION TAANG AH KÊSÊK GUAL AHI. ZIAH KIPAT CHUN LALPA’N MALZAWLNA APIA, KUMTUANG HINNA DING IN”.
Lalpa’n athu malzawl tahen.
THUKHAKNA:
Innsung, khuasung, kochuam leh namsung kituak tak leh kihouthei/kipumkhat tak ah khawsa khawm zingthei ding in LALPA’N malsawm ta hen.
AMEN !
🌷💐🌹
