TULAI THULÂM LENGTE ZALMANG GUAL HIMAI HEN
– KL MUANA KHAUTE
Tuchung namkal buaina ah, Meitei leh ZOMI- KUKI-HMAR leh MIZO tualgal ahin nang leh kei ti umlo in Meitei gal I sat khawm ah, haksatna namenlo I tuak a, gualzo gual in I lungthim tak apat in kikhen nawpna thim Lalpa’n ilak un gawlgukna ahun bawl hi. Tuhin pau leh pau ki daidanna leh ki ginlana neu neu a hung piang dawk hi. Tigual thil hi dawi umlo tak leh bawllo ding thil chu ahi. Tigual thil nasep hi, a chiazing chun lawsapna kalbi leh gualzawlona lampi piandawna hung hithei ding ahi.
Zo-suan te lak a ki muanmawna leh kiginlelna neucha cha, whatsapp a kimute thil khawk tak ahi. Pau leh ham a ki khennawpna, volunteers te leh UGs te kikal a ki muanmawna tamtak muthei in a um zing a, puaknat um leh da um mama thil chu ahi. Zia hi haisan a tribal cause a lunggual tak ah tha leh zung, sum leh pai a nasazaw sem ah panlak khawm zawk diu ahi. Gal lai a ei leh ei ki dem ah, kigensiatna hi melmate policy siam ahi, zia hi hechian a I common enemy te hi thi leh thau pawla I do zing diu ahi.
Tualgal umzing lai ah bang a hung suak ding hiat ahinai puai, eilak a kidawi tawklona tamtak um maleh gal do ihiu a kikhenna ding ahem, moral suk down theina ding bangma genlo ah I galteu I zaw phawt guat diu ahi. Achutilo chun, melmate anga puk sethei ihi zing uh hi gel zinga, ikituaklona teu leh iki muanmawna teu ki hiatlo sak ah, igalteu hi theitawp a kilung tuak tak a I do diu ahi. Thildiklo siamkawm ah zuau thu siam ah ki daidanna siam chu guallel thei ihiu. Tuhi a hunpet ahi thathak leh kitil kho thak in, common cause a pangkhawm a I melmau hi a tawp tiang a Pathian dawng zing kawm a I melmateu hi I nuaisia diu ahi.
I malmateu hi apil ua a hausau ah, tactics athiam ua ei unau kisiatna dinga policy chuam chuam a hung bawl pan tau a, zia tactics chu ei leh leh ei iki dem uh chun igalteu in ei nawmval ding in a um tau ahi. Ei Pathian hing hote thil neu cha cha a thepna umlo in, imelma gal lian tak hi zo zaw ding in kisathak kit hitiu. Ahilochun, kumtuang a galnuaia suak leh sal a um kha ding ihiu. Khaile unaute, nang leh kei volunteer leh ugs kikal a ki demand leh ki ginlelna nusia hitiu in chung Pathian pilna leh hepina gingzing in, imelma teu nuaisia in panthak latai tiu. Isuan ipak teu khankhua ding gel na’n Takchapa te’n thathak la in, melmate nuaisia ah umlo in, lunggual tak in melma gal huipi gual himaleh nang zo ding in kisa kin gang hitiu.
Chunga van Pathian in a chate ei nusia ngai puai, zia gual bawk achun eile kikhen leh lungput phalo neilo in imelma te hi hat tak leh hang tak in do leu hin, gual zo ngei ding ihiu. Awle, eima leh eima ki thunun chiat in melma hi do chiat leu hin, Lalpa’n zalen gam Self Administration nuai ah, In chuan a ei kawi ngei ding ahi zia chu mipite kinepna ahi. Lalpa’n a chate khankhua ding leh i nawp lenna ding chu guatsa’n ei siam piak ta ahi. Zia mun leh hun chu lua ding in siamtu’n ei malzawl tahen, Amen!
