Pu KL Muana in Lekhabu “Ginum Zing in aw” kiti hawn daw na nei
23rd Oct 2021 | GetinLamka
Pu KL Muana Vaiphei in The Vaiphei novel lekhabu, Ginum zing in aw (Part- 1), 2nd Edition hawndawna tuni 22nd October, 2021 in a nei hi. Lekhabu a genna’n a min mai hinle khawvel gam leh thagau gam a ding in ginum na a pawimaw dan akilang mama hi. Literature sukhat na ding in lekha zik habawl ah, I literature matdan in I khawtang salvak zo nailo ahiziak in khangthak lekha thiam taktak te’n lekhazik lam hung hakat zel ding in tilkhona a gen hi. Nam mipite chengbum lo maleu hin literature lam hatsak leu hin khat leh khat kisuikhawmna leh pankhawmna hatzaw sem um thei ding ahi. Khangthak te’n laa lampang ah gospel, love song leh a dangdang phuak tam po leu hin I khawtang ah pau leh ham, lekhazik masawnna um ding ahi.
The Vaiphei Novel lekhabu ziktu Upa Luttinthang in program item ah pangte leh mipi hungkhawm te chung in kipakthu agen hi. Zia Novel lekhabu, Ginum zing in aw, 2nd Edition, hi 1st edition 1988 kum in ala kinei ta ahi. Zia lekhabu hi true story apat zik ahi. Nuchan pani kilungsiat tak ah khawsa zinglai a nu’n pasal dang a hun neisan phat in a chanu’n a nu ngai ngawingawi ah aka ziktu’ mitngei ah amu apat in zia novel lekhabu ahunzik pat ahi. A moral story ahileh *Nute ginumna ahi*. Mihing hinkhua ahin nei zolo te, a neizo te hitaleh ginum zing ah I dinmun chiat ah khawsak ding ti tupna zia lekhabu hi zik ahi. Zia lekhabu 2nd Edition hi kum 33 nung ah hawndaw thei ahidan a taklang hi. Zia lekhabu hi nungak leh tangval hinkhua lamsang in adiak ah nupite leh pate a ding ah pawimaw mama mawpuakna kawk ahidan agen hi.
Pu Liankhawthang, Chairman, VLS in 1986 kum ah ama novel zikngei published ala bawl *A Lovers Laments* khale true story tawsaisan ah ala zikdan a gen hi. Zia novel hawngtu ah ala pang Pu Chungkholien, zia hunlai achun District Education Director ahi tile a gen hi. Pau leh ham ei a paitha lo ah mi namdang te pau le hiat a pawimaw dan agen hi.
