*PATHIAN PAWMTÂK GINNA LEH KISIKNA*
*GL Muana Neitham*
*Pathian chu pakhat ahi ti la gingcha, la bawl phai. Thithate’n le a gingchau ah, a kithing sek uh ahi*
JAKOB 2:19
*Zaziakchun, kuale Khrista ah a um chun thilsiam thak a hung hi tai; thil luite chu a bei ta’n, en tiam un, thil zosia a hung thak kit tai*
2 KORINTH 5:17
*Zia khawvel ahin Pathian dodaltu Pathian lem,Setan chu a um tak zet hi.Setan chun pan nasa takin a la zing in, a lalgam keklet gua zing in, chawl ngaloin(active takin) in pan nasa takin ala zing ahi*
*Setan leh a nungzuite chu a tak takin a um ui tichu ka gingcha ahi. Setan chu themtu pil leh chalak tak zia khawvel thilte neitu leb vaihawntu ahi tichu ka taksang ahi. Setan chu a atak takin a um hi tichu ka gingchak bep hilo in tak le ka taksang ahi*
*Achutileh Setan ging leh taksang a, setan ho le bia tina kahi diam le?* *Ahiloleh setan cha kahi tina ei diam le?* *Hilo e Hilo talua!!* *Setan bia leh ho ahiloleh setan cha tina ahi puai.*
*Awle , vak ngaitua tiam inle, Pathian hing, lei leh van siamtu, nang hung siampa Pathian chu a um hi ti la gingcha ve sam ahi.Pathian chu ginna in la gingcha, Khristian kiti khat chu lahi, adik hi! Ahinla, zia khawvel mite tawh ki lamdang na la nei chuam diaklo a,la hinkhua sual a mang tum zing hilo maw nang Unau?*
*Zia la ginna chun hukdamna, Khrista hukdamna ding in ating zo na diam?*
*Setan inle Pathian hing pakhat a um hi tichu a gingcha, tak le atak sang him ahi. Lei le Van siamtu Pathian bangkim siampa, Pathian zosia PATHIAN chu setan inle a he ahi. Lauh le a lau in, Pathian hing leh Pathian dik tak ahi tichu a gingcha him ahi* *Ahileh vak ngaitua tiam in le, Setan chu Pathian a hukdam na nei tina ei diam le? Setan chu Pathian a, Pathian cha tina ei diam?*
*Hilo e, setan chu setan ahi zing tho tho ahi. Pathian melma,themtu zia khawvel leh taksa thilte a vaihawmtu, buak leh thim lalpa chu ahi zing ahi.*
*Bang ziak ei tadiam le….?*
*Setan in Pathian ahetna leh ginna chu ginna thi ahi*
*Khaile tun vak ki ngaitua hitiu le: Pathian chu la ging a, a um ngei hi tile chu la taksang ahi. Jesu chu Leisiat mihiamte gitlona pat tat dawna na hung sem in, Kraws a khailup in a um a, kivui in, nithum nin thaan apat a thokit ahi tile la taksang ahi*
*Ahinla nang ah Pathian vak umlo, la nunchan leh hinkhua a lamdang na umlo, khawvel mite Pathian hing belo te, thinglim suanglim hote tawh ki batlona, lamdang chuam bikna neilo lahi chun Setan ginna thi tawh kibang ginna thi nei lahi tina ahi*
*Ginna thi nei, setan gual a Pathian ginna leh launa thi lanei chun, Khristian kiti setan chate lahi mai hi. Biakinn a kikhawpna ngai poimaw ve sam sek, mission workers kiti, nam leaders ki tite lak ahin setan gual a ginna THI nei atam na ding e ,zia gual a ginna THI nei lahi lam ki hetdaw hun ahi tai aw unau*
*Pathian paakna lasa dan a kinei ahinla fashion show na leh taksa lawpna bep buaipi a, zi le pawsal hawlna mang setan ginna THI nei, Khristian lem te kisik a Pathian bél hun tak zek ahi*
*Pathian a ginna dik neite hettheina bailam pen chu amau hinkhua a kithengna ahiloleh lamdang na het leh muthei hi ahi* *Setan suak a um zing te tawh Pathian chate hinkhua matdan akibang theilo him him ahi.Thagau a Pianthak nei, Jesu tawh kizawpna neite (personal relationship with Christ Jesus) chu Khawvel mite (fleshy and carnal) tawh kibatna a neilo uh ahi*
*Ginna ziak ah Pathian hepina hukdam chate, piangthak techu taksa leh Thagaulam in Hinkhua luite mang ta in, Khrista a hinkhua thak anei tau ahi*
*Umchan thak, hindan thak, nek le chak hawldan thak, ngaituana thak leh dawi leh lunglutna thak anei tau ahi. khawvel thu le dan te a buai talo in, atup uh le a thanawpnau thupi pen chu PATHIAN thu lam ahung hita ahi* *Pathian thilte thiîl in,Pathian lopina ding in a hinkhua uh amang to zel tau ahi*
*Lawi le pai phalo te taisan in, nidang a gitlona a ngainat te chu a melma ahung hitan ahi*
*Tuhun a hin kingaitua thak hitiu unaute, nang ah leh la hinkhua ki siamthakna, lamdang na la neilo a, Jesu neilo, Jesu tawh kituakna neilo, ama a PIANTHAKNA neilo lahi chun la ginna THI tina ahimai hi. Tuni hin gilo lahi kihechian inla, la GITLONA CHENG KISIK in JESU BEL IN*
*Aw Israelte haw, ngai tiam un, Lalpa I Pathian uh bep hi Lalpa ahi. Lalpa la Pathian chu la lungthim zosia’, la ngaituana zosia’ leh la hatna zosia’n la hepi ding uh ahi. Zia thute, tu’ni ka hun thupiakte hi la lungthim un vop zing un. In ah la um unle, khual gam ah la um lai unle; la lup unle, la thaw daw unle la chateu het ah la gennon zing ding uh ahi*
DAN LEKHABU 6:4-7
*Doitak, a phalo chu enton kiu inla, a pha chu enton zaw tau in. Thilpha bawl taphot chu Pathian ah kipat mi ahi’n; thil phalo bawl taphot chun vang Pathian a mu puau hi*
3 JOHAN 1:11
*Aw LALPA la gam hung tung tahen*
*☦️KHRISTA LALPE’N SEPAITE ☦️*
21-3-2021
