NUPA HINKHAW TUAN TING:
K.L.Muana Khaute
Tanglai leh ngaklai I hung hi apat in lungguk in damsung kawppi di suangtuana ahung ki nei pan in, lungguk thimthu um chu a tak leh alem kihiattuana ding ahin tha leh zung, ngaituana tamtak aum hi. Himaleh, a tak suana ding ah chun kam a vak gendaw ziang hi ahak sa chu hingei ding ahia, kiguk et leh kiguk vei sung hi a sawt nuam ah Haksana lunggimna tawh vanglai hun hi aki mang deu sek hi.
Chutia hun I mat hun sung a chu Ama’n ei lungsiat tak tak na diam ti leh damsung ah khawpi dawi um leh inkuan te a dingah ginum leh cha leh nau etkawlna leh kipak ni leh haksat ni’n bang kim ah a muan um diam ti ngaitua zing kawm in lungguk thimthu chu I hung puang ta sek ahi. I lungtung dingah I gin chak te leh hut thei leh I lungsiatna thuguk zak cha sasa I puan chu ei pawm piak na diam ti lunggel chiazing chu a chawldam ziang theipua, lung awkkai in hun tampi a ki mang sek a, gim-um leh haksa tak chu ahi.
I lungthim ah lungsiatna kiphum-gu chu lau pum pum in ihun puang a, i thumna leh ki neplo gual ah dawnhuna aum khak ding gel na’n i taksa chu a amtha ziang sek hi. Kinep gual ah dawn na aum lo vang chun zachatna tawh lungnatna kidim ziang sek ahi. Amabo, a lawsam a um gual in a lawting le I um sek hi.
I thimthu le ei pawm piak uh chun kipak na’n I dim sek a, a chang leh ginmawna tawh hinkhua a ki mang in, tuibang tawn ni ding I ngak la tun tun sek hi. Lungtup gual in eigel ki lungualna chu nu leh pa I hun hiatsak a, ngaitua di maban sep di te hun ngaitua in khenkhat te a lem lo lai in khenkhat te tuibang i hung kigawm ta, I lim ma ma hi. (khawtang leh kochuam) hiatpi in I hung ki Cheng ta mai a, mihiamte siam gualna chu I hung supiting ta, zia phet ah chun insung siam di leh khankhua di ngatuana I hun tamzaw I mang pan ta ahi.
I hung ki Cheng ta mai in; cha leh nau te etkawl di dan I ngaitua bep uh le hilo in khawtang tawh chenkhawm dandi te I hung Guanggal a, insung chawn leh kochuam chia dan I hung zui a ngai ta, nungak Tangval hun nawp gual kha a ki mang thei tapua, buaina leh sep di ngen in ei chum ta, a chang leh kisik bang le aum ziang thei ahi. Amabo, hepina khat ah gui in ei kankhawm zel a, nek leh chak te hawl in inkuan lawtinna ding I suangtua, a chang leh lungkham um leh hepina ziak in kinepna liantak tawh I nupan in pan I la khawm a, ka chang um sek maleh kinepna pum ah kal isuan in, Pitin lam I manaw ta ahi.
Khenkhat te a ding ah cha leh nau te ngaituana ziak in nu leh pa le hiatmil chang a ki nei sek in, thasiat muisiatna ding le aum thei hi. zia bep chu hilo in chate ziak ah midang ngaisak talo ah um ziang chang bang aum in, zia chu khenkhat te ding ah thasiat umtak le a la hithei zel hi.
A ziakchu, cha leh naute leh midang te ei hepina sang ahin nupan ki heipna hi a thupi in a gil zaw sek ahi. Hepina Chullo Pathian apat hung kipan chun, nu leh pan hepina hi a kikhen thei him him puai. Zia hi a lawsap chun insung lawting aum ngai puai.
Zia a chung ah I gen te, cha leh nau ngai tak luat ziak in nu leh pa le athase thei a, a diak ah chun nupan kikal kingaisaklo leh ki khawtualo ziak in buaina tamtak aum thei in, kikhenna le aum thei hi. Abang chu hitaleh I heipna masa-vaphual nupan kihpi gual khawp leh Pathian apat hepina lo chun inkuan lawting leh nuam chu aum thei puai.
Bangkim ah nupan hi a umkhawm zing di, thil bangkim a ngaitua khawm ua bangtik lai a le aum khawm ua a pankhawm zing diu ahi.
Damsung ah a kikhen lo diu ahi. Tichun, amau tegel zal in siamtu Beram hawn gual in Chingtup in, a kiangah chawldam khawm chiat ding ahiu.
