☠️ MIHINGTE BAWLLO HIAL DING……KHAMNA THEI💀
Bible Changtel:
Vaihawmte 13:4.
Isaih 5:11., 28:7.
Thupilte : 20:1,17.,
23: 29-35.,31:4.
Ephesiah 5:18.
Aziktu:
Pu Ginlalthuam Vaiphei
“LALGIN INN”
Mualngat Innpi
Khualzinna Gam
(LALPA A AHI)
PO/PS. Moirang-795133.
☠️☠️☠️💀💀💀
Khawvel hin phatlam sangin siatlam manawh zing ahi lai in igamsung ah KANI/POPPY hih malzin tûn ah a hung tûng mai tâk hih chuh aw…..vangkhuazawl lungkhamna leh beidawnna te kih belapna khat ahung hitah mai hi.
Kani/ poppy aching, anek, achep leh azawk ziakun China te hih khawvel ah super power chawi ding lai hinapin, kani ziakin super power chawi zotalo in USA ten a la chupiak/ lak piak
tau ahi.
Chuleh China gam hih Kani/Poppy hung kipatna(Epi-centre) ti ahle hiat ahi kit hi. Chun, Kani gaal( Poppy war) 1839 leh 1860 kum in gaal ala sat maleu aphachuam talo ahi. Chutichun amau gamsung bep hilo, a ki naipiu gam, Arunachal Pradesh tiangin zia khamthei thil kani hih ala tung in, Singpo kiti namte hin, vangsiatna lian tâk, ala tuak khawlawh tau ahi. Zia, Kani chep leh nek ziak in mihing ala kiampha (population decreased) tah hial mai uh ahi.
Chun ei Manipur, Ukhrul District apat,Tangkhul upakhat inle kani hachin in ala ching ah achapa IAS hisak guan, sum tampi chuh vang khawl dawk hinan’a, himaleh achapa chun IPS ahun mu nâ chuh; training hungchai pan in first field posting, chuleh a thalaw( salary) le laman lo in Thingnuaimi ten akap lum tau ahi. A thini apa thugen…..”Diklo tak ah sum muna hih aguitung/azik suak/ abuting aum ngai puai”, tin a chapa luangchungin ala gen ahi.
Ziaziak achun, Kani/Poppy hih mihingte dingin bawllou hial ding ahi, sum muna hawipen in nei maleu hin uhle vangsiatna eitut thei Kani/Poppy khamna thei chuh ahi.
Chun Kani chin ziakin gamsung ah thing leh guate achai zota, guazuk, nisat dante ahung kitheng ah chuleh soil Erosion ahung um a tanggam ah nimchim(landslide/mudslide) tite hih igam in hung umthei ding dinmun ngawn ahung hitai.Tanggam i kinepna pen uh lauthawng um isuak sak tau ahi. Ziate sangah lau thawng umzo nalai chuh mihingte damtheina le nasatak in asuseh theina lai lâi ahi, sumhau maleu hin uhle damtheina hung kibasam taleu hin uh ah bang chuh aphat chuamna um ding ahi tam….!
Sapten “HEALTH IS WEALTH” atiu hi adik ma ma ahi. Damtheina hih golulpen lak ah khat ahi. Kani bawl hih haisan/tawpsan thei hihenla hitaleh igamsung boruok/ thigua hileh hungthiangtho deu intin, ziakachun lunggel dang tichuh kani chin sangin cash crops dang summu theina ngaitua zawleu hin igam damna hih zawlo ding ahem?
Diklo taka sumhau sangin, chaga taka khawsak hin, mihing lunggel asiampha thei zawi.
Bible in khamna thei bawlte chuh:
1. Mihiam lunggelna ala mang in, kinak nate chuleh lungkhamna atun thei hi.
2. Chagatna, gentheina zosia atunthei nalai lai hi.
3. Lopina sangin niamkiakna ahi zawi.
4. Kiven tup zolona ahi bân in, pil kisa maleu khamna thei ah lawpchuh mingawl ahi.
5. Mi gin umtak, aum thei pua, taksa utna belaptu bep ahin, ânnchuh ânn in asenthei puau ah maleh pung diak puan’au.
6. Lungthim ngawlna leh siatna ahi ban in, taksa chuleh thagau tiang ah manthaina atun thei nalai lai hi.
A hileh, kuate avem, dasek ? Kuate avem, genthei lungzinna kisun khum sek? Kuate avem, aziak azal bei ah beliam pûsek ? Ziate hawchuh khamna thei ah chambang sekte chuh ahiu. Zia gual mite chun ahinnau ziangle itchalo in, meithai leh nauchaga lo dinglai bang…! meithai, nauchâgâ in akawi sek ahi, ziaziak achun khamnathei te hih nangin gualpha siamna lai lai ding la hem ? A tawpna le gûl gû nei gual in hun chuun tin, taksâ chuleh thagau tiang in manthaina hun tût khan’a e. Ziakachun khamnathei nek, dawn, chep, ching leh zuak hih haisan tai tiu aw…..a kithaman puai, a kithaman pua tah luai.
I kiang i kawm ah miten, khawhephalo hial in bawl maleu, nang leh kei invang….bawldaham ham hitiu e, khamnathei thil him him hih Pathian phallo/zâkdâh ahi ziakin atizat um talua ahi.
Awle, atawpna ding in gam lian taak tâk nei, khaw Hausa, nautang, chuleh ka nam
chanpite i gamsung uh hin Kani/ Poppy leh khamnathei him him hih chin/ bawldaham hitiu aw….Zia khualzinna khawvel ah mihingte bawlding chih ahi him him puai, Pathian lekhabu imu gual un, simtute zosia’n khamna thei apat kikawi kâng chiat thei dingin Lalpa’n ei malzawl piak ta hen.
😰💀☠️😭
