15th Sept 2021 | Kanam Vaiphei, Hilsawntu.
🏅LAWTINNA CHUNG A KIPÂKNA THUCHA🥉
A masa pên in Lalpa Pathian min pâk in umzing ta hen.
Ka chapau L.Kennedy Vaiphei in Meghalaya Board of School Education (MBoSE) nuai ah, Higher Secondary School Leaving Certificate Examination (HSSLCE), 2021, merit list ah 2nd position (ARTS) a hung mu’na chung ah pi leh pu, tû leh châ, nu’ leh pa, lawm leh gual, suapi leh sanggam, ni leh gang, nulam chanpi, innsung dawngcha, kochuamte leh ei hung kipâkpi tute zosia taksa damna chibai. 🤝
Lawtinna thuphâ muntin ah eila tângkopi Media te: 1) The Northeast Today, 2) Nisin Thuhiltu, 3) The Manipur Express, 4) The Shillong Times, 5) Vahûi TV News, 6)WhatsApp leh a dang dangte.
A neucha’ pat pawl 12 tiang School a hung kaina, St.Xavier’s Hr. Sec. School, Moirang leh St. Edmund’s Hr. Sec. School, Shillong ah ziltîl tute; zia bân ah eila pauchappi Pastorte, Upate leh a dang dang; ei kipâkpi tu’, mimal min hun sulang lo ah, ma’ni hi’di pawimawte hun nusia in tîlkhona thuchâ, sil leh chên, nêk leh châk tui tak tak, sum leh pâi, thâ leh zûng man tam takte hun sêng ah, kei uh innkuan in bangma tik lâi ah le ka hun thuk zawlo ding tiang ua, lei hung kipâkpi nateu chung in Lalpa Pathian in a lê tam tak in hun din thuk ta hen.
Ka kipâk nau chuaithei ngailo, khangsâwn tiang ah le bei ngailo ding a hi. Lalpa Pathian in la khawsak nau mun chiat in damna pha’n hun umpi zing henla, hung malzâwl chiat ta hen.
ZIL ZÊL AH SÂNG ZÊL DING IN……. tih tawh KA KIPÂK TAK ZET UI.
Kei uh,
1. Dimlalnei – Nunu
2. Ginlalthuam – Papa
“LALGIN INN”
Mualngat Innpi
Khualzinna gâm
15/09/2021
