*KINGAIDAMNA LEH KICHAMNA🤝( FORGIVENESS AND PEACE)

*KINGAIDAMNA LEH KICHAMNA🤝( FORGIVENESS AND PEACE)

Aziktu: Ginlalthuam
Lalgin inn
Mualngat innpi
Khualzinna Gam
(Land of pilgrimage)

🙏
Amasan simtute zosia damna CHIBAI🤝

I GAMSUNG UH, MANIPUR AHIN TULAI TAK’IN KINGAIDAMNA LEH KICHAMNA HI I MAMAWH PEN UH AHI DIAH AW……!TI’IN.

Bible chângtel:
Mathai 6:14,15; 9:6, 12:32
Luka 23:34; 24:47.
Ephesa 4:32.
Hebraite 10:18.
Jakob 5:15.
Kolossa 3:13.
Ziah, achung ah chângtêl apat hin, “KINGAIDAMNA” CHULEH “KICHAMNA” umdân leh umtheite imu thei uh chuh kingaidam tuah chiat unla, la sukkhial nau kingaithiam/kicham tua tah un ti ahi. Min la chûng ua thil a sukkhial chun, Jesu Krista’n, la gitlo nau a ngaidam gual’in kingaidam tuatau in.
Sapte thupil: “To err is human, to forgive is divine” ti hi umzia nei tak ahi. Ngaidamna hih Pathian apat ahin, khawvel mihingte gitlona sândûp ziang maleh ei ngaidam thei chuh Lalpa i Pathian ahi.

“NGAIDAMNA KITI HIH KINEPNA SANGPÊN LEH THUPI PÊN AHI. ZIAH KINGAIDAMNA IMU KIK DING CHUH KICHÂMNA LEH KIPAKNA AHI. NGAIDAM THEI KÊILO KITI CHUH…….SAZU GÛ (POISON) DAWN AH THIDING NGÂK TAWHBANG BEP AHI”.
Ngaidamna hih Sappau in FORGIVENESS a kiti’n, “TO FORGIVE IS THE HIGHEST, MOST BEAUTIFUL FORM OF LOVE. IN RETURN, YOU WILL RECEIVE UNTOLD PEACE AND HAPPINESS. UNFORGIVING IS LIKE DRINKING RAT POISON AND THEN WAITING THE RAT TO DIE”.

Ngaidamna hih ei khristiante nisi’n hinkhua, van matchâk gual ah imat theilo ahi chun, Sawlchâk Paul in Korinth mite kiang ah “hepina/ lungsiatna neilo mi chuh vaikhutbet kibêng leh sum-eng kikhên gih gual mai bep ahi”, ati.
Nisi’n ah kingaidam tuah zing hih khat leh khat ding ah lungthim nawpna ahi ban in chawldamna ahi kit hi. Leiba, kidit kik zo talote Pathian min ah kingaidam tawpmai hih thil haksatak himaleh, ala ngaidam him him tia, kikiam chuamlo hial ziang ahi ei vei. (Mathai 18:27) .
Maleh mihingte’n I hinkhuau ah ngaidamna him him i neilo ziak’un, pa leh cha ki innkhenna, nupan kâl buaina, tatsualna, zawlsâina, kikhuai khennate chuleh gaal leh tual ah ki etna te ziak’in, i innsung, i khawsung, i kochuamsung, i namsung leh igamsung ah phung leh chang kibung khenna te atun khawlawh sek ahi……!

Tulai khawvel chuh kihepina, kilungsiatna, kingaidamna chuleh kichamna lunggêl gelki um talo, daan zui bukimnate le um diak talo, mani nawp dân chiat ah khawsa, thiam leh ching, pil kisa tawk chiat, Pathian hawl him him ki um talo, a thil siamte dangka, sumlehpai, nei leh lam, gothil chuleh khawvel leh asung thil umte ah ki ngawl ah ki buaizo gamta……Innsungnute, innsungpate chuleh khanglai thahat lai te, bangti’n imawpuak nateu ensui zo mawng mawng ding ihiu em?
Min ei hosiatna, ei mutawmna, gaal leh tual ah ei kinawh khumnate, mi ei bawlnate hih izuk gêl phat tak ahileh khuttûm pat ziang nading le atam ma ma mai sek; himaleh, Lalpa’n, keima’n ka ngaidam gual in nangmau le kingaidam tuah tau in eitih ahi. Pathian in mihingte hih kingaidam tuah zing dingah ei siam him ahi.
Bible ah Lalpa Jesu Khrista thisan zal’a ngaidamna chang masa, tualthâ na ziak ah suangkul tâng, Barabas leh tualtha’t ma bawk Khrista tawh thing kross chung ah kikhên dên, achanglam ah pangpa kha ahiu. “Jesu la gam latun phat le ei hezing ah aw”. A vak tih hin,. I Lalpa Pathian ngaidamna bukim chuh athi dikuan chah in achang chet mai ahi. Ahin, Pathian ngaidamna hin tawpchin (limit) neilo, aneu alian, aching athiam, ahau azawng chuleh agilo pente le umchuamlo, ngaidam zawhlo le nei diaklo, a ngaidam theilo le um diaklo, (limitless forgiveness power and authority) nei ahi.
A ngaidamna ala châng tah, suangkul apat kithadawk Barabas khan Lal Jesu thisan zal ah ngaidam ahilam lam le ala ki hiatphâk tâklo ziakin a chanchin suidi umtalo, vawiman in ah mangthai tah ahi kha……!

Suapi, u leh nau, ngaidam theilo ding bang la nei tahmai thei, himaleh Lal Jesu min ah thisan khat hi na’n ala ngaidam ham ham tia, mi kuama kisik aum ngaipuah, Lalpa Pathian ngaidamna hethiam dingah mihing ah siam ihiu ahi.
Ahileh, nangin ladikna, mi bangvei zat lah langaidam kha tam ? A dikna mi ngaidam kiti hih tamlo ahi, himaleh aum thou ahi.
Ziah gual ngaidamna chuh… Dr. Graham Staines leh acha pawsal panite, Philip tawh Timothy te, 22nd Dipi/January 1999, (Jaan lungngai ûm tâk) ni, tha leh kum a khan, Orissa/ Odisha state ah gari sungah hâllûp a um, Australia Missionary te pachahaw thina kha… dikna’n, azi’n a ngaidam tawp mai ahi. Ziah ka gen nawp khat chuh ichênnau leh imawmnau Manipur gam ahin gaalzam (Refugees) lahiu ti’ah gaal leh tual ah ei kinawhkhum mai uh hi thawk chuh vang ahak khawp mai hi, himaleh Lalpa Pathian in… “La gaal teu la hepi ding uh ahi “. Ti’in ei la gen gual in, ei gingtute kingaihtua a ngaih kasa khawp mai ahi. Khawvel gam hih Khristiante dodâlna (Anti-Christ) chuleh hanselawna gam ahi tihih hiatmil ngailo ding ahi.

Ladikna mi la ngaidam ahi chun la ngaidamte luchûng ah mei-âm kawi piak tawhbang lahi. (Romte 12:20) Aziak chuh, Lalpa’n, “…phuba him him keima lâk ding ahi…”ati (Rom 12:19; Hebraite 10:30; Thupilte 20:22). Kua hem Lalpa lungnatna âwtdawk thei chuh……! Ziah gual michuh mi hâmpha/mi vangpha ahiu.

Awle, tuni ka gên nawp pên ahile Lalpa Pathian in achapa changkhat nei sun, I Lalpa Jesu Khrista thisan zâl ah ei ngaidam/ei latatdawh tâksate ihiu ah innsung, khawsung, kochuamsung, namsung chuleh gamsung ahin sukkhial, bawlkhial, genkhial aumlo theilo ahin maleh kingaidam tua in kicham guah chiat hitiu in, taksa leh thagau lam tiang in le nam khat te bêk châ hih munkhat- thakhat ah sêmkhawm/bawlkhawm in, lung kigual tak’in tahkhawm dial dial thei leu hin nawp aumna lawm lawm ding e.
Ziah chuh ei Khristiante nunchan dinghim Lalpa’n ei guan piak chuh hilo ahem…..!

Mi la ngaidam nuamlo ahi chun Pathian inle hun ngaidam theilo ding ahi.
Kum leh phat, chuleh hun ala mualliam tate haw’ah sukkhial, genkhial, bawlkhial tam tak ih lanei teu hawh khah Lalpa Pathian kiang in ngaidam thupha chawi in ei uh mihing leh mihingte le kingaidam in kicham kik zel hitiu e.

A tawpna dingin, ka suanma ma, Theologiante, Nam Puitute, Intellectualte, Khua vaihawmtute, YVA te, Zillaite leh Politician te hih adiak in, sakhawh mi ahihngei ngei ding uh ahi. Pu.M.K. Gandhi in, “A politician must be a religious person”, tiin ala gen hi.
I kochuam chuleh i nam â ding ah mi suan um tak te, kochuam leh nam chuleh gamsung damna ding leh khan letna ding ahin khat leh khat I KINGAIDAM AH KICHAM kik hih apawi mawh pen hilo a hem ? Lalpa’n athu ei malzawl piak ta hen……..Amen.

KA GENKHIAL, KA ZIKKHIAL, KA BAWLKHIAL NATE AUMLO AHI PUAI HIMALEH KHRISTA THISAN ZAL AH THISAN KHAT HI’NA ZAL’IN KINGAIDAM TUA ZEL’IN, I KICHAM ZEL DING UH AHI. I LALPA JESU KHRISTA ANI VEI HUNG KIK NA, DAWN THEI CHIAT DING IN……KINGAIDAM AH KICHAM TUA CHIAT TAITIU 🤝