HEKSEKIN MIMAL LAWKNA DIN
By- KL Muana
Pu leh pa thugosia chu mimal aitang phatna ding thuneitu te leh midangte kiang in mi himawhna leh hiatchianlo thu in midangte gensiatlo di ahi atiu dungzui in mi dikna hi henla diklona chu ki tangkopi zing in, a dik leh diklo chu mitphetlo kal in a hung ki lang mai sek ahi. Mi heksiat hi hun chawmkhat a ding ah gualzawna leh lawtinna chu ahung hi thei hi. Ahinla, thudiklo chun ga phatak a hun sua dawk ngai puan, a tawp leh zachatna a hung hi mai sek hi.
Mi diklona ahem ahiloleh chanvo, maipha dawina leh hawlna ziak ah puitute leh khangualte kiang ah ki heksiatna chu meikhiat chang ah gam mei hal gual mai ahin, lawtinna, malzawlna hi zing pakcha nitak lam ah a pul gual mai ahi nuam sek in, hektu a di’n kipakna le a bukim puan, hek ah umte a ding ah le hun chawmkhat mualphona leh lungdawnna bep ahi. A tawp ah thuchian hiat chet nung tiang inle ki lainatna kimuanna chu vaibang a tham mai mai hi. Ziaziakachun, ki gensiat sang in kipakchatna hi lukhawng a nei zawi.
Zia gual bawk a chuh ki sakhuana ahem, mipi ki vaihawmna lam in le a dik leh mipi tam zawte ki lunggualna hin genkhel leh bawlkhel a tawm zaw him him hi. Mimal ki mudana ziak a hem, chanvo phazaw dawi ziak ah kilawtsiat leh ki bupna hin khawvel KHANG chiazel ahin lawtinna sang in lawsapna’n a tualdel nuam zawi. Ziaziakachun, thupha I hiatte hi I gen a I hinpi di ahi ziachun taksa leh thagau lam in mawlzawlna in a lamtua zaw ding ahi. Khaile, I Bible in a dik ta phawt pawmna um ta phawt chu I zui diu ahi. Zia chun mihiamte a ding ah go lultak a um hi, zia chu Khrista suangpi mihiam zosia ginna leh hinna chu ahi.
