COVID-19 APAT DAMNA
😷 👏🙏👍👆👇🏻 😭
Bible chângtel: Pawtdawna(Exodus)32:35
Chutichun, Aron in bawngno lim a siam piak, a ho ziakun mipite chuh Lalpa’n hiipi in a gawttai.
I la hiat taksa bang un China gam Wuhan khawpi apat virus hung kipan chuh India gam ahung tun, 30th January 2020 in Kerala state ahung tung masak na pen, March 25th ni’n Prime Minister in 3 weeks national lockdown a hung puandawh ni chun zia natna hiivei mi 500 vel hiat in aum ta ahi. Tuni chan in khawvel pumpi a 1.58 million in ahinna ala mansua tau ahi. India gamsung ziang ahle mi 1,42,000 val athi ta’n, Manipur gamsung ziang inle mi 300 val a mualliam tau, chuleh ei Churachandpur ahle mi 30 vallam in ahinna ala chan ta ahi.
Tuni i gen nawppen ahileh zia hiipi natna apat damna khawvel ah vaccine efficiency stage 3 tiang hung chai, America gam ah Moderna kiti leh Pfizer company in asiam chuleh Russia te siam Sputnik, India gam ah kikapna ( vaccine) siam minthang pên Serum Institute of Manufacturing leh Oxford kithua khawm ah asiam uh, a naipen ah muthei chuleh kikap thei ahi tai tii Govt. apat hiat ahi.
Zia na chung achun mi zosia hiat ding ah a pawimaw pên chuh gam ah kikapna(vaccine) a umzat sanga covid-19 vei atam zaw ahi nalai hi. Mi zosia kapna ding(vaccine) hih chawk zaw ahilo ding ziakin awl awl ah a kul leh pawimaw dungzui in kikapna(vaccine) guanggal in aum thei ta ahi.
A masapen in India pumpi ah frontline tichuh health worker: Doctor, nurses, paramedical te chuh kap masak pen hin tin, aban in kum 50 chunglam, zia natna vei ah kihete, zia zaw in kum 50 nuailam, natna hii vei thei din mun adingte kap ding tihih programme siamtup sân a kawi tau hi.
Thu kihiat dan in 59% of Indian population, damdawi kapthei ding ah kawi hitale akilawm hi. A chung ah kigênte hih Govt. in sep ziang thei dinga Action to be taken programmes himaleh bang tiang a hun suk pitin ding uh vang hiat ahinai puai.
A bang chuh hitaleh Covid-19 natna pat damna dingin vaccine hih thakhat sungah hung kikap pan thei tading ah ginchak chuleh April-May 2021 tiang ah khawvel in damna ahung muding i ngaklah uhleh i kinepnau chuh ahi.
Zia damna hun chuh itun masang un, World Health Organization (WHO) ahin, Health Ministry hitah henla, state govt. in Standard Operating Procedure(SOP) a puan hih damna dingin zui ham ham leu hin ikidawi sak nau lian pen ahi.
Mizoram ah displine a nei hawi un,Govt. bep ngansia loin Kochuam leh Civil society ten thei-pa-tawp sua in tuni chan in mithi, mi 10 ating nailo uh ahi. Thumatna hih Pathian malzawlna leh vangphatna ahi him ahi.
Ei Manipur ahin SOP bangmanâ i ngailo ziak khat uh ahi tadiam….Covid-19 ziaka mithi 300 val ziang ta hilam !
Awle, achaina dingin zia khawvel ah ihinna ding leh idamna dingun amasa pen in Pathian thupiak izui, izawp ding, zia ban in thunei chungnungte thu thu zui ding zia zaw chuleh mihing in damna chuh mu kik talo ding ihiu em? tihih i kinepnau chuh ahi.
Pu Ginlalthuam
Lalgin Inn
Mualngat Innpi
(Khualzinna gam)
PO/PS Moirang-795133.
😭😷😭😷😭😷😭😷
