10th April 2022| Kanam Vaiphei
Lamka, April 9: Zillai Churachandpur Block in tuni, April 9 sunnung dak 2 in Zillai GHQs Office, Bethel Area, New Lamka ah 2022-2023 term vaipaw thak ding kitelna a nei hi. Zia hun a hin Chief Election Commissioner, Kaithianjoy Vaiphei, Secretary, Organisational Affairs (Ext.), Zillai GHQ leh Election Commissioner Genthianson Vaiphei te’n a mapui u’i. Outgoing General Secretary, Th. Kamlalmuan in Secretary report piakna nei in, election chu pat ahi.
![](https://www.kanamvaiphei.com/wp-content/uploads/2022/04/Photo_1649595246048-225x300.jpg)
Election hi propose system ahia, Unit tin a pat member chiakhawmte propose leh vote khiakna a pat President ding ah Lianlalbiak, Vice President ding ah Francis Thangliansiam banah executive member ding ah Thangmuanjem, Kamminlian, Daniel Suantak, Ngaih Mercy leh Kimngainem te teltin in aum ua, Election Commissioner in teltin thak aum te kitiamna le a nei sak ngal hi.
![](https://www.kanamvaiphei.com/wp-content/uploads/2022/04/Photo_1649595246048-225x300.jpg)
Outgoing President Kamzamuang Vaiphei in teltin thak aumte kipakpi thu puang in, maban ah Zillai leh masawnna ding ah panla to zel ding in a tilkho hi. Election process zawthian ahi nung ah Chief Election Commissioner hiatpina tawh kikhutsanna le a nei ngal u’i.