16th Oct 2021 | Kanam Vaiphei
YVA JOINT HQ IN SILVER JUBILEE MANG
Tuni 15th Oct 2021 ni 5.30pm in Hotel Classic, Imphal mun ah YVA Joint HQ Silver Jubilee Pu James Henneimang Vaiphei President YVA Joint Hq. Imphal hina in mat chai a hi tai.
Zia hun a hin Pu LM Khaute IPS DGP, Manipur Chief guest hi’n Pu Paulunthang Vaiphei IAS, Addl Chief Secretary, Manipur Chief host ah pang in YVA Joint HQ memberte leh Joint HQ huam sung ah um YVA Block leh Unit Puitute leh YVA Puitu luite chiakhawm in Jubilee programme chu lawting tak in mat a hi.
Zia hun a hin, President malarna in Puitu mualliam ta mi 4te sunna hun lehJubilee Dak khetna hun nei zawm a hi.
Chun Chief guest Pu LM Khaute IPS,DGP Manipur, in YVA Silver Jubilee Suang hawnna a nei ah, Founder member te leh ex President te chawihawina thilpiak piak na leh YVA Tawmngaina Award Tv. Lam Creason leh Pu Joseph Thanglet te piakdawna a nei ah, chun Pu P Vaiphei IAS kiang ah memento (a umta lo, Pu Kaihau Vaiphei, retired IDAS hiatzingna ah Ambulance ei Imphal YVA Jt.HQ ahun piak na chung ah kipakna etsakna) le ei piakdaw piak a hi.
Chief Host Pu Paulunthang Vaiphei IAS, Addl. Chief Secretary in YVA Silver Jubilee Souvinir hawnna leh YVA min ah Blood donation a la bawlsek, 5vei sang ah tamzaw donate a la bawl ta tawmngai mi 13 te kiang ah kipakpi na thilpiak le piakdaw na a nei ah, chuleh VBCA Kochuam in kum tampi thanmual VBA min ah Imphal YVA in a la kimang sek kipakna latsakna memento piakdawna le ei neipiak hi.
Seppi pawl dang lam ah kipat in le palai YPA-8, YMA-4 leh HYA-4 ten ei hung uap thei ua kipak a um takzet hi.
Chun, VPC GHQ, YVA GHQ leh Zillai GHQ lam a pat le holimna ngaithak a hi.
Zia hun a hin Rev S Prim Vaiphei, President AMCO, in hun hawn pauchapna a nei ah, Rev. D. Lulun Exe Secretary VBCA in Suang leh Souvinir karna pauchapna a nei ah, Rev Khupneithang in hunkhakna pauchapna ei neipiak hi.
Silver Jubilee hi thupi tak ah mipi zosia huap ah bawl tei ding ngaituana in ningkum a kipat a hun chawn to a hia, Covid ziak ah buaina ziak in duthusam gual in I bawl thei tapua khawk a kisa takzet a hi.
Hunkhak zaw in Luaithena nei a hi.
YVA Damsawt hen
Secy. YVA JtHQ Imphal
![Young Vaiphei Association(YVA) Joint Hq. Imphal in Silver Jubilee hun lawm 16th Oct 2021 | Kanam Vaiphei](https://www.kanamvaiphei.com/wp-content/uploads/2021/10/compress1634350442959.jpg)