VOTE MANTAM LEH THUNEI DAN HIAT A NGAI HI
By- KL Muana Vaiphei
Gam zosia’n democracy a zui puau hi. Gam khenkhat chu sepai thahatna, mi khat vaihawmna leh a dang dang a um hi. Ziate lak achun ei uh gam chenna mun hi democracy ahiziak in zalenna tam tak I nei un, I vangphau hi. Nam lian leh neu ti chuam umlo, a zawng hau ti chuam umlo, a thiam leh thiamlo ti chuam umlo in mipi zosia kibang tak ah ki- etkawlna gam ahi.
India gam ah democracy government nuai ah khawsate hin election hi ngai pawimaw a ngai hi. Election hun ah lulpen chu vote ahi. Vote kiti hi mimal thuneina, kum 18 apat chunglam sia’n I gamsung ah Inpi ( Government) kivaihawmna thuneina I nei sun uh ahi. I vote lultak chu government kitelpina kum 5 (nga) dan ah um MP/MLA/MDC hun in I mangcha, zia dungzui a chun mipi- palai ding I teldawk sek ui. Ziakachun, vote hi I puitu ding telna ahiziak in a mantam mama hi.
Election hun ah I vote uh mantam leh lultak chun kum 5 sung ministry a siam hi. Zia sung a chun a constituency sung ah um mipite zalenna piak dan, buaina apat thawvenna, office ki- etkawlna, khawtang kivaihawmna leh khantona a um thei hi. Ahinla, vote piak khial a um thei ah, mipite leh a gam in a mamawlo buaina tuntu mai government siam khak thei ahi. Government a buai chun mipi- palai teldaw ah umte le a constituency mipite a ding ah a hing hingal ah a thi gual hithei ahi.
Mipite vote zal ah government um ahiziak in mipite dawi chamna, kawng bangkim ah khantona siamthei tel a ngai hi. Gam dinmun niam tak, khawsakna haksa tak tak te dawnzangkhai tu ding siamthei tu chu mipite I hiziak un I vote uh thupi mama ahi. I vote in puitu a siam a, government a siam a, government le a sangtthei a, a tungding thak kit thei ziak in vote hi a lamlo ah va mat khak chu thil khawk tak ngei ngei chu ahi.
Bible apat inle Pathian leh mipite kikal ah puitu hinkhua tam tak a kimu ahi. Pathian in a guat puitu a um ah, Lal Jesu ngei khah ahile chu a mite tandawk ding in thina tiang huam in a hunsawl kit hi. Mosi’n Israel chate saltanna apat suachakna mun ah ala pui danteu I muu ahi. Ziate apat hin zillai I lak ua eima mimal chiat in zalenna hinkhua, chamna leh muanna, khantona leh a dang dangte I nei theina ding un puitu tel pilvan a hun mama hi.
I gam leh nam neu mama leh genthei mama, nam lian zawte ang ah suak leh sal gual ah ngawngkawl ah tanna, I nam mi tawm ziak leh pilna lam ah khanglian gua panpan ah nam liante vaihawm khum leh awpkhum ziak ah manthaina lam nai hiai hiaite hin I puitu mipi- palai kitelna ah I thuneina um sun mantam leh lul mama ziang I VOTE uh hi suachakna leh khantona ding ah diktak ah I mat diu ahi.
Kawl leh vai, nam lian zaw a dang dangte a ding in mimal vote zalen tak in a chiathei tai. Ahinla, ei uh mi Veng khat zat/ leikai khat zat le phalo te a ding in vang I nampi kikhaikhawmna kivaihawmna dungzui ah mipi- palai tel a ngai sek hi. I mimal vote I gawpkhawmsa’n le I gam I nam sung ah khenzakna mite policy ziak ah a um a, mipi- palai I tel khial vang leh I kawng zat chuam chuam in I thawk khawlaw sek nalai ui.
Ziakachun, democracy nuai ah nam neu ei uh lawi gual constituency khat leh ni ah Candidate/ MLA nei maimai te a ding in vote punkhawm dan thiam hitiu in, I vote mantam leh thunei dan hechian ah I vote matna dik tak ah lutsak leu hin I gam leh gua hung paklun mai ding ahi.
