VLS in Zillai Thimthu Pawl Xi leh Xii te lekhabu ding hawngta.

Tuni 28th June, 2024 sun dak 12:00 in, VCC Hall New Lamka ah Vaiphei Literature Society guangal na in Vaiphei MIL pawl XI leh XII – ZILLAI THIMTHU lekha bu hawnna leh latna a la um hi.

Zia hun a hin Pu Henlianthang Thanglet, President VPC GHQ in Khuallian hina tawh uap in Vaiphei MIL pawl XI leh XII – ZILLAI THIMTHU lekha bu hawnna a nei hi.

Zia hun a hin Pu Francis Mimin Vaiphei in hun mat na mapui in, Upa Thangzadam, Exec. Member VLS in hun hawnna pauchapna a nei a, lamtuana thu, Pu Tongneilal, Secretary VLS apat a um hi.

Vaiphei MIL pawl XI leh XII – ZILLAI THIMTHU lekha bu, Pu Henlianthang Thanglet, President VPC GHQ hawn dawna a nei hi. Lekhabu hawn na nei zaw in Rev. L Khupboi, Executive Director EOC in Pathian kiang ah Lekha bu lat na leh pauchapna a nei hi.

Zia Lekha Bu chungchang genlatna leh thilpiak piak na hun Upa Liankhothang, Chairman VLS in hun a mang a, Chun, Khuallian apat thugenna a um hi.

Za um Pu Henlianthang Thanglet President VPC Gen.Hq in a thugen na chun Vaiphei Literature Society in tuni tiang ah pan alak dan teu thupi sa leh ngaisan um ahi dan genin, Lekhabu ding a zik hi thil haksat ahia,Lekha thiam tele lekha zik mite apat lak khawm te chun I Literature society te panpi mama hi, Zia ziak chun tuni ka advice nawp tak chu Lekha zik lam te hin lekhabu a siam thei di khawp in lekha zik lam hi hapan hitiu tin agen hi. Lekha thiam, Professor tampi um ta ma leuhin, mani pau lam ngaisak lo hi itam ui, Paukepbit na din Literature hi apawi maw pen ahi, Literature neilo te chu Nam niam aki tisek hi, Tuni ahung khawm te zosia hi Literature ngai khawk ngen hun tai khawm ihiu ka ging chai tin holim na chun agen hi.

Chuleh Pu Lianzalal Vaiphei, President Zillai GHQ hun piak ah aum na thugen na chun VLS te sangtak apak cha ahi thu atak lang hi. India Gamsung in pau 1300 sang atam zaw aum tan, ahin la pau 200 te chu kum 50 sung in ala mangthai kit ui. A ziak chu recognised himaleu a pau nei ten a ngaikhawk zawlo ziak uh ahi,ei unle I pau uhi I ngai khawk uh pawi maw mama ahi tin agen hi, Zillai in le pau lam ti chu lekha lam ahin ma satak ah lak ding katiu in essay competition leh poetry zik ah kidem na lam VLS taw pang khawm asai ding ti leh thil chuam chuam project ka nei ui, zia ziak chun I pau uh kepbit ahi thei na ding in I society ua organisation um ten I tawsawt uh a ngai tak zet hi ati.

Kipak thugenna Upa Kamkhozuan, Vice Chairman VLS apat in a um a, Hunkhak Pauchapna Upa S Bella Capvung, Exec. Member VLS in a nei zaw in hun matna zaw a hi.

Vaiphei Literature hi kum 1969 in phudaw in ala um a, Vaiphei MIL hi Manipur board in kum 2005 in ei la recognised piak ah, zia a kipat chun pawl IX apat pawl XII chan Vaiphei MIL hung ki nei pan thei a hi tai.