24th Oct 2024 | Kanam Vaiphei
VICE PRESIDENT, VPC APAT HAINA OCTOBER 23, 2024 Kum 17 ka hi ah Zillai Churachandpur Block (ZCB) Vice President mawpuakna piak a ka um hun ah kipat in nam nasepna nuam ka sa, ka lunglut a, theitawp sua ah pang dan in ka ki-ngai hi. ZCB ah Secretary, Vice President leh President (term 3) ka tu kha, zillaite kipawl limna ding in Units’ Meet ti ka patdaw pi a, Lamka khawpi sung ah college leh school ah zillaite’n kumsin in kigualsiakna leh kipawl limna hun hoitak nei ahi sek hi. Zillai NEI in mawpuakna chuam chuam le ka la tu, General Secretary tiang mawpuakna piak in ka la um hi.
Zillai sung ah sawng chuam chuam umte – Unit, Block, Headquarters, Welfare leh Advisor in ka la sem suak a, i nam sung ah pawl umte lak in Zillai ahin chan vangpha chang chungchuang ka kisa diak hi. Zillai-Simlai Joint Conference matna ding in Dongjang khua ah thingpi awm in Upa Luttinthang, Pi Goilianniang leh ei famsanta Pi Phalianniang-te tawh kal ka la suan ui. Ei famsantate Pu Vungzadam leh Pu Nekzasoi nuai in Secretary-na Vaiphei National Organisation (VNO), Lamka Block, in ka la sem a, zia chu sunzom in Upa Khaitingen Chairman-na nuai in le Secretaryna ka la sem hi. A tunung ah dinmun sang zaw tu ding ah ei somdawl leh ei sek masate ahiu a, ka geldaw hun a tam sek hi.
V. Munlai khua hausa Pu Khuptinlam vanglai tak in Vaiphei Youth Federation (VYF) din in a um a, ama President-na nuai in Secretary, Information & Publicity leh General Secretary mawpuaknate ka la sem kha bok hi. VNO nu leh pate’n hun sawt chia ding ah ei lemsakpilo ziak un ei famsanta President Pu Lengpao Vaiphei inn, Imphal, ah meeting nei in VYF phiat in a um hi. VPC ah Pu Khatkhotong Baite President-na nuai in term 2 General Secretary-na ka la sem a, tukum Presidential Election ah mipite doisakna ziak liau liau in Vice President ding in lankai in ka la um hi.
Zia VPC Presidential Election 2024 le tha 4 vel bep chia pan himaleh thil um dan ka en a, bang gual in ka nam ngaina ah kikoi in, mawpuakna apat kiawngsut ti hih ka bawlnop lam hilo maleh thupukna siamlo theilo dinmun in ka um ta, a khawk ma ma hi. Ahinla, nam nasepna hih nam nasepna bep ah hun sak mai ka tup zing ahia, electoral politics in ka kigol kha pua, MP/MLA/MDC kuama ka zui kha pua, zia ah chu haina siamthei ah ka um hih ka lung a dam takzet hi. Nam nasepna ah ka vangphatna pen chu pauchap piaktu ding nu-leh-pa Pathian in ei piak khak ahi. Inn ka lut leh ka pawt in dot a ngai hun in ei dot piak ua, kipak thu gen a poimaw hun in ei gen piak sek ui. Ka nu kha val talua ka sa sek a, ahinla, tuni hun apat nungthil in chate phatna ding ah gentam takluat, thuhil mun takluat ti umlo ahi ka hechian tai. Ei thumop uh thupi pen chu Pathian lau ding leh thudik leh thulai dinpi ti ahi.
Tu hun dinmun ahin ei dampi nalai hileu bangti’n ei thuhil un, ei pauchap piak diam uh ti ka suangtuana in a hung kilang a, ka nu-leh-pa ka ngaina a puang diak hi. Nam nasepna ah kal ka suan masak lai ah a nung uh ka la zuite – u Joseph Duhliante, u Soilianmangte, u Lalneikhaite, u Khamkholalte leh ei famsanta u Genlal Khaute te ka geldok vung vung hi.
Zillai NEI revive na ding ah a panlaknateu khan thathaw-na ei pia, nam nasepna ah ka lungthim ei phudet sak hi. Kum 40 val chiata in Vice President, ZCB, in nam nasepna ka la kipan a, zia Vice President dinmun ma ah VPC ah ka hina, tuni, October 23, 2024, apat hai ka hi tak dan hiatsak kawm in ka nam mite hiatthiamna ka hun don hi.
PDF la dawi le blue colour chu click in
