VAIPHEI INSUNG KI SANG BAWL DAN LEH NUMEI MAN LEH MUAL THU
– KL Muana Khaute
Vaiphei inkuan kivaipuak dan, man leh mual chuleh a nep a nawi tulai KHANGTHAK te hiat ding in ka hiatdan neukhat ka hun sulang nuam hi. Pathian in inkuan khat leh intum khat chiat ah ei siam ahitak ziak in, siatni phatni ei panpitu ding in indawngcha siam a ngai sek hi, 1. Becha 2. Zawl 3. Chanupi 4. Chanu neu aki ti sek hi. Ahi’n, khat chun Becha neu leh chanu val nei pawl le a um tho hi.
MO DAWT DAN: Khanglui lai a chu mo hel (dawt) di phat uh leh zu bel indawngchate leh insungmi a pawimaw sia tawh mo Ava dawnv(Zu alup) sek ui. Ahinla, tulai in chuh a sakhua zil in mo hel in achia TANGPI tau. A diak in zu thasang in thingpi bangnawi ava khaisek tau. Mo dawt/ hel hi thumvei thingpi awm a lemchang kisan tua ahi. Chun, a thumveini leh hiatpitute tawh a kichenni ding a guat sek ui.
Mo dawt thu leh kinawp tuana a siam di phat uh le vawk/ gan gual satulpi’n dawtlum in tiu in, a gan dawtlup uh chu a thisan anak ahem ah a pawt lo chun a lemlo dan ah ngai ahi. Mi khenkhatte kulmut diak te’n athin alung a phalo a um chun a kicheng theilo di I hiu a tisek ui. Zia hi SUMTANSA aki ti sek a, lemthei ahichun sadak khat leh a kuanlam te’n a kipuak sek un, a dangsia chu a nekhawm sek ui. Zia hun hi kitepna ankuang gual ahin, bang ahem ti a guitung zolo a um chun a kitepnau supiting zolo te’n sial khat a liau sek ui.
MAN CHUNGCHANG: Vaiphei chanute hin nam dangte gual in man leh mual a nei ui. Khanglui lai a chu sial-7 kiti pawl, sial-10 leh sial-15 man ka hiu kiti pawl le a um hi. Zia sial -15 man kahiu kitite hi Khuanghau inkuan leh Hansing inkuan-te ahi deu hi. A ziak leh zal chu zia genlang khello in a banlam ah gen di’n kawi phawt hitiu. Man thu I gen phat leh amasa pen chu Manmala ahia, zia hi gan thinggui chuan kawkthei sial ahi. Pakhat/Bawngchal ahileh pani, api ahileh Bawngpi nuchan ahi ding ahi. Tulai chu khawvel khantona zil in sum ahiloleh dangka abituk umlo, kiho thei dan dan ah pawm ahia, zia PHAWIKHAT a sim ahi.
SA KITHA DAN: Numei pasal neithei ding ahichun sa thumvei tha di ti ahi. 1. Sumtansa atha ding chun sawng nivei a tha ding ahi. Sumtansa kithat chu alu, angawng, aphuk asung hunkhawp chu vaihawm chiakhawm te’n neikhawm intiu in, Sa-hapni chu a kuan lam te’n a chan diu ahi. Chun, insung upa chanvo di chu azangtin/ a-ik a chan di ahi. Chun, sabel amin masang in mo man kihona akipan sek ua, aman zat a genkhawm un, aman khumzaw zat satang aki thil a zia sa kithil chun aman khum zat uh a etsak hi.
Sawngsa: Sawnga hi a satha uh hapni’n azui di ahi. Sawng phuk teni inneite chanupi’n a chan di ahi. Inneilam chanupi’n a liang khat leh a phuk khat chang intin zia chu chanu neu a hawp di ahi.
Sahap chu a liangte gel chu chanute ki hawm intin uh a mal pani chu bechapa leh zawlpa ki hawm inau.
Sumphalsa hi numei man kila zat a indawngchate kiang ah piakna aki nei sek hi…zia chun man abat zat uh le hiatthei ahi..
Sa sengsit: Mo nu Seng puak di sung, tuthaw, gawvua , Nam, a khualzinpi a nekdi sachun, satha, samthi, sa sengsit puandum in a khu di ahi. Zia lak ahin puanthe leh thil pawimawi khenkhat le khum ahi.
Zu- ngawng kiti le a um a, zia chu mothak zaw nung a, nu leh pate mitthi thiakna ahi deu pen hi.
Chanu thakna hi a lianpen ahileh Lutuam (puandum khat) lak ahi. Chuleh, a neupen in pasal a nei ahileh nautawpna pen ahiziak lai tuam puandum aki la sek hi. Amabo, milai chu sutlai awl iti gual un no ia Lutuam or laisui chu a awl hi
