VAIPHEI CHAWN LEH KHAN SIAL LEH NUMEI MAN

VAIPHEI CHAWN LEH KHAN
SIAL LEH NUMEI MAN

🇵🇪VAIPHEI TAWNGSUA✍🏻
La Nam Chawi Sang In
🗓️Vulte 9-2024

‘Sial’ ti thumal hin kâwk pani a nei thei hi. A thugêntu (speaker) mat dan leh a gênnawp pen, a thu/ thil tup dungzui in kâwk a nei hi.
A. Sial hi gancha lam thu gên a hi phât leh gancha (Sial tak) genna a hi sek hi.
B. Sial hi châwnna Dân pau (customary term) a hi. A kâwk chu go lûl a hi. Thil leh thuam pha, chuleh, mihiam natiang hi le Sial ti ah gen a hi.
Etsakna: I nî a hem, i suapi numeite a hem khat chapa, i tû chu “Ka sialpi sung ah piang, ka tupa ngei ngei a hi” i ti seku’i.
c. Numei man chungthu ah go thil ah nei thei, ûm leh bêl, khî leh dâk, sum leh paite hi le sial ti ah gên a hi. Sial tawh kibang ah ngai tina a hi. ‘Sial’ hi gancha ki gênna thumal hi ziang leh le tuibûk muam khat hi le a muamtu hin lûl tak ah a ngai phawt chun, sial tawh tuk a hi. Guallui mite’n thil lûl a genna phawtu’n Sial a ti seku’i. Go thilte leh angaituanau ah lûl phawt hi Sial a tiu hi. A chung ah ki gênte ziak ah hin Vaiphei numei man kibang theilo in a khang a khang in a la um hi. Nam khat sung ah mi chiat, a man tam deute leh aman tawm deute um hi kilawm salo in Nam sung ah lamkai liante leh khaw hausate kigawm in kum 1930 in Sinjang khua’n gên khâwmna a lah neiu’i. Zia tak ah kithugualna dungzui ah chun “Vaiphei numei zosian Sial sawm a mat di” ti hi a hi.
Ahinla, zia thupukna kisiam hi le a thu mai ah um
in bangma sukdanglam a nei thei tak tak puai. Tuni tiang in Vaiphei Chanute hi man kibang theilo zing in a umu’i. A khen in sial sawm leh nga a manua, a khen sial sawm a manua, a khen sial giat man a hi kitu’i, adang khen khat in sial nga a manu’i.
Tu lai hun ah chiapi ding ah phasak chu bang jat mante chu hi ziang leu le Man Mala tilo Sial kêng ding lâklo di ti hi a hi. Man Mala Sial kêng ding hi le kua man a tuak ahilo leh a sung ah chapawt khel khel ti taklo di ti hi a hi. Man Mala sial kêng ding hi kipak leh lungdam suklatna a lian piate ‘n a piaku jakda hi puan
tin, a neizolo khatin a neu, nawi ngawlta a piak in le ataksa demkai a hilo chun pawm di a hi. Guallui mite’n numei man, apawsal in a piak di hi sial sagi (7) in a lah bithiaku’i. Kisaktheina ziak ahte/kidawi chuam bawlna ziak ahte kigawt nawpna ziak ahte/mi dang khenkhat tawh kibat di nawp lona ziak ahte, numei man hi sial sagi ah pat sawm leh nga tiang a hung tung hi.
Sial nungzui, khi, dâk tite hî tulai hun ah mu haksa
a hitâk ziak in, khî leh dâk sik ah sum a hem, bel a hem
man khum dite leh man ne dite kihothei dân dân in chia ina.
NOTE: Zia achung aki gen hi Vaiphei Peoples’ Council General Headquater in Vaiphei Numei man ding ah atang gual thei pen ah asiam ahia, Vaiphei chanu Zi nei kha ten tepte ah, zui chiat din pha a hi. Ei ma nawp dan le ki hotheina ziak ah dan le mual kisiam sa pal kek tei tei hi bawl da thei ta leu hin phan ah.
Vaiphei Thusim, Chawn leh Khan Bu

📁_Admin_✍🏻
Vaiphei Tawngsua