TULAI INSUNG KI SANGLEI DAN DANGLAM LEH MAK
– *K.L. Muana Khaute*
Phat chiata, kum ala tam nailo maleh kumkihei dungzui ahita mai diam, nek leh chak hawl dan leh khanchan um dan leh ki suklim dan leh kipawl dan a kidang ma ma ta hi’n ka hia, insung kivaihawmna, khawtang, kivaihawm dan leh gamsung a kidang ta’n, kilungsiatna, kipanpina leh lim leh kipak tak a khawtang leh kochuam kipawlkhawpna titakna tawh kingaina tak leh thalel ngawi ngawi ah nunnawp kimang khawm talo a bang ziang tai. Thil bangkim kibawlte hile I et dan suk bukimna mai ah kimang a bang tai.
Zia hunbi masa lai a kihepitua I pu leh pau teu hunpha leh limtak in kingai leh kithalel ngawi a, khuaizu chik leh thiangtho tak tawk hinkhua mang pan kit tai tiu. Achuti chun, ki hepina pung intin kimuanna khawvel hun suak ding ahi.
Zia achung a hun mat dante ziak hi ahita diam, zing thaw hun la um talo, zan ip-hun la um thei talo, inkuan hona, pauchap hun la um zing thei talo, chiana leh pawtna, sep leh bawl le ki hetpi tuapi le um talo, democracy gam tak tak a khawsa ihi tau, a chang leh in-buaina tamtak a um a, zia phat chuleh inkuan buailo thei ahita sek ahi. Zia ziak achun, insung kivaihawmna pu leh pa pate’n a patsau kha zui thak kit leu hin khawvel a lemna hung um kit ngei ding in kinepna kanei hi.
Khawpi sung ah inkuan tampi hi mi mu leh hiat ding achun inkuan kilawm leh tak gual a um himaleh ki tuaklo, annek hunle kibang leh insung phatna di bawl manglo, lup hun leh seple kibanglo, insung phatchuamna ding mawng mawng bawl, inkuan minsiatna ding leh khawtang phatna ding him him bawllo a khawvel tui-za ah zap ziang lungawi tak gual a um, ahinla à lungthim a kipakna him nei ziate haw hi khasung ah buaina a bawl ua, zia chu mipi I buaipiu a tawp in ahun siatdam ah a dam takna a um theilo ahi. Zia gual khawvel ah khawsa I hiu a nu leh pan le kingaina tak tak a kicheng hilo, melhaw ziak, hausat a kicheng, a lo theilo a nu leh pa te’n a gawp, dawichak ziak a kiman, kidnapped, mudana ziak ah a nungak paklai ni suk mualpho nawp ziak a chawmcha sunga ding kichenpi pawl a um kit hi.
Pathian in nu leh pa dan chu kilungsiat a, suan leh pak hing ah khawvel a Pathian thilsiamte enkawl ding a siam ahina tawh I Bible in nupan chu a damsung sia kilungsiat a kikem ding ei guat ahi dungzui in I hepina khaugui in ei kan khawm zing henla, damlaini vawmchawite tawh mangkhawm thei ding in siamtu’n hatna khaugui leh chawi ngailo chun ei kankhawm zing ta hen.
Tulai insung, khawtang, gamsung a kidaidannate, kimuannate, kithangsiatnate, ki-itthikna mihiam a ding ah phalo haw nusia in Lalpa hepina puan ah kithuam in siamtu ei siam gual in damlai hun chawmcha hi mangkhawm dial dial tai tiu. Khamthei ching zawngsak, guchak, tualthat, lepchia, thanghuaite Pathian cha ahiu a, amau khankhua diule Lalpa’n ngaitua piak in a. Zu leh sa, chungleng vachate le bubuk leh lo a nei puau a, ahi’n a siamtupa’n a chandiu a guat piak ahi. Kuale, thilsiam zosia chawmkhat zaw leh siamtu kiang ah chawldam chiat di I hi. Pathian thilsiam zosia asia apha zosia Ama kianga chawldawm chiat di I hi. Lalpa chu lopi tak in chawihawi in um ta hen. Amen.
