THUNEI NA LEH LALNA SANG IN GAM LEH GUA NEI HI MIHIAM TE A DINGA LEI GO LUL PEN AHI
By: K.L. Muana Khaute
Thuneina leh lalna, sum leh pai, nei leh go ah hausak lunggulna ziak ah gam leh nam hun chawmkhat phatsan in lalna leh hausakna chu khawvel ahin nei thei chu ahi maithei hi. Ahinla, vaikhawnung I damsung leh khangsawn te a ding in suak ngawngkawl tanna leh manthai na ahi thei hi.
Zia chungchang hi khangthu kisuina leh kizikna ( history) tamtak in I mu’u ah I hiau hi. Amabo, ei dinmun hung tung taleh zia hun lemchang achun malai mi masa te hikhel ziak ah puksiatna I hiat te tawsaisan ah ki siamthak na’n I mang thei taktak na diam? ti chu dawtna leh dawnna chu haksa tak hingei di ahi.
Etsakna’n, malai ah Hausa lopi taktak te, mithiam milal leh khawpi lopi taktak te hi a suan a pak te’u in aluazo ta puau hi. Chun, ahunlai ua khawsung ah nauchaga liangvai, inchen lochen haksa, apu apa’u khang ah genthei te’n lalna leh lopina vaihawmna nuai in I khawsa tau ahi.
Ziaziakchun, khang masa te sul zuikhel leh ginkhel te gel dawk in ahunlai ah Siamtu lunglam hawl leh mihiam khankhua dik zui dan thiam chiat leu hin masawnna neukhat bek um tei ding in ginchakna leh kinepna liantak ka nei hi.
Khankhua nei te leh Pathian bia te, I Lalpa Jesu ziltilna zui leh a thagau thiangtho ah thuam leh chenchilte I hitak ziak uh leh ei ma hinna hu -thagau hi kitimat zing in kalchawi zel ah hin ding, taksa leh thagau hinkhua dik leh thiangtho ah kalchawi in kisiamthak leu hin khang kibasam um talo ding ahi. Chun, hinkhua buai leh thinung ah thagau vakvai leh lei hinkhua khel lam ah ngunkhamtual khawpi ah chun lungdawi te leh Belam no tual lenna achun limtawp umlo in lengkhawm ngei di ihiu. *”Lalpa, zia ka tup gam nuam leh lei guat piak Zion khawpi chu ei pui tung in”* ti ah Lalpa kianga a ban thahat panpina dawt hun ahitai.