THINUNG THAGAU HINKHUA LAMDANGNA GAM KA TUAK VANGAM EI LUNG LEN
10th February 1993 Kum in ka nau Lalkhokam@Kamboi S/o Rev Haukham, Mualkot khua leh a nau Khamlianlal@Lala Khaute, Imphal Punjab leh Sind Bank kiang ah, school uniform chaw ding in a unau un a chiau ah, uniform chawdi kisa a et vel lai ua chu PLA ( Meitei thingnuaimi) te bomb thang kam chu Punjab leh Sind Bank kiang in a hung puak ta, amau unau chu Bomb puak chun a mun a chun Lalkhokam chu liam in a bei ngal ah. A nau Lalboi chu liam thim maleh a hinna chu a ki humbit zo ham hi. Chutia a buai veng vung lai achu a pu, Gang S Vaiphei Jurisdiction ahiziak in Police leh YVA Imphal te tawh a luangdamsa chu puak tung a hin, Mualkot thanmual in KSP( MPCS) Programme siamna in, 11 February 1993 kum ah vuiliam a hi. Zia kum a chu Bachelor of Divinity (Serampore) West Bengal ah kabawl kum a hi. Kei a ding ah lunggil natak kawm ah, lekha sim chu haksa mama na chung in ka course chu zo thei ham ham in ka exam a lawtinna chu ka chang a hi.
Zia hun lungngai hun leh thawm hau um tak a ka um lai in thilmak hunkhawp ahung tung ah, ahin bangma lau le ka nei puai ahinla ka nau te chu mel in mulo ma leng, ei umpi dan ah ka hiat ziak in ka tha a muang ma ma hi.
Tichun ,exam chu ka hun zaw in, Calcutta apat train in ka lawite tawh Manipur ka hung zuan ua, tigual ah Inpi lut mai chu a hak mama ah ahinla lut lo theilo ka hi pua, mitthi thiak pum in ka room a ka lut ah, ka naupa chu ala um na lai ding a gingchatna chu ka nei ah, amabo, sulnung gamdai ala chang zaw tai, zia chu a hi, ka lunglai ei phawng in ka ulchiim in ei bawm ah. Unau piangkhawm kikhenna mai hi le mihiam a ding ah genguallo leh hak tak ahi ti ka he chian in, kei leh kei ka kihenem mailo chu nem tu ding dang a um thei puai.
Ni hung tum tha in khua ahung thim ta khumlaizawl lam ka zuan in lup chu ka gawta, ahinla ka mit ka sing thei himhim puai, chawm khat zaw achun van lam apat in ka nau leh van Angel vamte a hung kum suk ua, ka In chu ahung lut tau ah, tiachu ka nau leh Angel te ka muphat in “Bawi, kei khualgam Bible zilna apat ka hung tung tai Insung in hung lut un” ka tia, amau chun, U In hung lut da tang ka, van ah Pa’n “la U ahung hi vave in” eitia hung ka hiu chia kit tang kau ti’n van lam zuan in Angel te tawh a chiato kit kawm in “zia lei hi khiak la kham a hi puai, I nutsia diu him a hi *”hanthlir te u romei zam kara he lei ram” ti la sa in vangam lam zuan in a chia kit tau ah, zia chu lunglenpi in zia gam chu ngai in ka hinkhua atam zaw ka mang ta ahi.
Zia khawvel hi I chendenna ding uh ahi puai chawmkhat I khawsak ua Lalpa na sem ah lim tak hinkhua mat hi Pathian lunglam hingei di a hi. I hunpha a umna la sia I mihing pi leh Pathian a ding ah hinkhua mang in Lalpa a ding ah mat hi malsawmna leh chawldamna ahi.
