THILPHA BAWL👌
Bible chângtel: Galatia 6:9,10
Aziktu: Pu Ginlalthuam
‘Lalgin Inn’
Mualngat Innpi
Khualzinna Gam
( Land of pilgrimage)
💪
Simtute la leng un damna chibai uhle….!
Lalpa Pathian in mihiamte hih thilpha bawl ding leh napha sêm ding ah ei siam ihiu in, I sepna mun chiat un mani lawkna ding mai hilou in midang te kithuapi ding ah ei siam I hiu hi.Tichun, mihiamte hin nâ sepna I nei chiat ua. Zia nâ chuh alian leh aneu in a kikhen ah. Eima mani nasêm chuleh government nasêm/ thilbawl i hiu hi.
Britishte khang in sawlkar nasêmte hih ‘Master’ ala tiu ah. Mipite hih ahiu le ‘Servant’ ala tiu hi. Himaleh, kum 1947 apat ei India gam in zalênna ihung mu’ in zia chuh ahung kitheng tuata. Government nasêmte ahiu leh servant ahung kitia, a mipite hih master ahung kitita ahi.
Zia gual ah kithen tuana hih kum 72 lam hial ala liam tamaleh, ei India gam ahin zuithei tak tak lo I bang ua. Government nasêmte master hizing in a mipite servant gual in India dân Britishte khang apat ila chiapiu hih, tu’ khangtiang in atawp thei ta puai.
Zia ziak achun, government nasêm khenkhat ‘servant’ ahi lam lam uh kihelo in, alet leh lal nau mun ah mipi dân-leh-mual hia um talo; office ah zuchiate simmaw tak ah ui-ho-ak-ho ah kiho châng bang mipite’n I tuak sek uh ahi! Kilet sakna ziak in India dân pal kêk hilo ihiu em? Mipi’n thu nei talo, sêmtute zawkin thu anei tâk ziak un, nêkgûk-châkgûk apunglo theilo ahi ta ahi. Zia-nalai tak hih India dânpi’ I zuikhial nau chuh ahung hitai.
Government nasêmte leh mipite hih a kua zawk hih thunei zawding ihiu em ? Pu M K Gandhi in tihin ala gên hi, “Government jobs are meant for serving the people”-Government nâ zosia hih mipite nâ sep piak nading ah kisiam ahi( Meitei te’n “Seba touba”atiu hi ahi). Chuleh, Pu HT.Sangliana, IPS in tihin a gên hi, “Police officer khat ah pan hih mipite kithuapina dingah service pha tak ahi”.
Pu HT.Sangliana,IPS gual hih ilak in tam leu hin chuh, I gam leh nam hih khangto mai lo ding ahem?
Ahi’n, India mipite I vângsiat nau khat chuh, tulai ah athiam-aching, alian-alal, sawlkar nasêm khenkhatte hin mipite nasêm ah pan nâk sâng in, thilpha bawl ding lung ah le gêlpha ngai sek loin; mani go thil ding bep ngaitua na’n, mipite chan ding tiang tiang bang hei kawi in, “zawng thawk ding, ngâu in thuak”, ti’ gual deu dân in, eima let leh lalna kualsung ah thilpha bawl ding he ma ma ngâl ah bawlthei sek lote ziak ahin, mipite liangvaina atut bân in I gam in khantona abasam sek ahi.
Office ah mipite thil ngaitua ah zuchia khawm sekte chu I gên tângpiu in ‘a mawl’ deu leh ‘a ching’ deu aki um kit hi. A mawl deute (office chia dân helo leh a tângpi sum nei zolo deute) chuh mu’sit ah um in, a ching deute (sum gawlgukna bawl zote) chuh ngaisak bikna lunggêl inei sek uh hih, India dân nuai ah sêmtu dingin I tit nadiam? Mi zosia chung ah thilpha bawl ki um talo; ginna’ I innkuan pite chung tiang ahle bawl diak talote I hiu. Spirit of public service has been missing from the public servants- Mipi nasepna (public service) thagau hih mipi nasêmtute( public servants) lak apat in a bei zotai.
Lalpa Pathian I honau leh I nasep dân teu chuleh I lunggêl teu hih Pathian biak inn gual in I mang talo uh abang ta e! Ziak achun, ei uh Kristian chapa leh chanute bêk bêk cha’ hin I nasepna mun chiat un thilpha bawl chimchâk puai tiu. Thilpha bawl ah I ha’pan zing ua le ahun takin a gâ luak ngêi ding ihiu.
Chutichun, hun lemchâng I nei zosiau hih mi zosia chung ah THILPHA BAWL na’n mat guachiat hitiu.
👍🙏👍
