THATDANA HI VAICHATNA BUL AHI
– K.L. MUANA KHAUTE
Mihiamte hi thutak tawk gin-umna leh kukalna tawk thil phachuam sem ding ah siamtu’n ei guat uh ahi. A sempeilo leh mi zulzau chu insung, khawtang leh mipi a ding ah suanlam di hawl in kilepna ding a hawl sek ban un insung, vantang a ding in matna ding a um pua, siamtu malzawlna le a chang ngai puau a, mi nuizat buk a chang sek ui.
Thatda leh lepchiana lampi ei pui lut a tichun gukna ahun kipan a, mihiam leh Pathian ma titna nei talo sek I hiu. Zia ziak achun, gin-umna leh kukalna hi tukdet a, hinkhua mat hin lawtinna lampi ahun hi sek hi.
Zilna lam hita henla, nasep thilbawl in kuama phak a nei puau. Mihiamte hi I chantawk a sem di leh hakat tak a I thilbawlna zosia titakna mani septhei kham kham ah sem ding ah guat leh ngai te I hiu. I mawpuakna gin-um tak a semlote chun gual a phan him him puai ti I Bible in ei hil ban in inchen lochen inle I muthei hi.
Khawsa-ul pawt a sem di leh lemgel thiamna tawk a semte chu Pathian leh I mihing chenpite a panpi in, malzawlna dawng sek ui ti I he chiat ui. Chutia chu ngaisaklo te chu mi nungdel khutdawte ahi tangpi deu hi. Gunchu tak ah tawmngaite chu amau chantawk in malzawl in a um sek ui.
Hansia dawng leh lemhiatlo ziak a genthei leh chau chu a um thei hi. Amabo, gunchu tak leh tawmngai tak a sem ham ham chu genthei leh liangvai mu ding mi a vang ma ma hi.
Ahinla, zuau leh nal leh thil thianglo chu chawmkhat hattak gual in um sek maleu, a lopinau chu zingkal pak ahung pak a nitak a vuaitha pai gual ahi. Zia ziak achu a gam leh dikna chu hawl in gin-um leh thutak a sem chu kumtuang pak gual in a pakvul lai ni in a paklun zing sek hi.
Zia gual mite chu tuiluang kiang ah thing kiphu chul ngailo gual chu ahi. Awle, eile damsung hun chawmcha sung ahin titakna leh gin-umna Siamtu a ding in um zing hitiu. Zia chu mihiamte leh Pathian dawidan ahi. Pathian thu hi a tak a, kumkhua dan ahiziak in a thilsiamte le damsung a pakvul zing ding in Lalpa’n ei pui zel tahen.
