THAGAU THIANGTHO CHENCHIL UMZIA
EZEKIEL 36:26 Lungthim thak hun pia’ng ka tin, la sung ah thagau thak hun koi ta’ng ka; nangma taksa ah kipat suang gual ah tâk lungchang chu ladok ing ka tin, phe gual ah nêm lungchang khat hun pia ta’ng ka
Ezekiel 36:26
Moreover, I will give you a new heart and put a new spirit within you; and I will remove the heart of stone from your flesh and give you a heart of flesh*
Simtute zosia Jesu Khrista min in Chibai. Pathian Thagau Thiangtho chenchil umzia tamlo vak ngaitua khawm hitiu aw.
Khristiante te chu bangkim Pathian apat ahiu hi. Khristianna hi dawisak ziakah kipiak leh nei thei chi ahi pua ngal ah! Khristianna hi Pathian apat liau liau ahi. Khawvel pawlte dan a Khristian na chu Khawvel dan gual ma bei ding ahin hinla Pathian apat Khristianna chu kumtuang daita ding ahi. Pathian a hukdam te, Thagau a piangthak te chu Van Pathian apat ahiu hi!
Pathian hetpi leh ama apat Khristian ihi na em tichu kidawtna poimaw tak ahi. Taksa thil in vang ngainawp um ahi puai chuleh mimal kipakna tunding ki dawtna ahi puai. Ei mani ngaidan a Piangthakna kipia ihi khato uh em? Kochuam leh revival speaker iti sek teu ahiloleh camp a thugenten pianthakna ei piak gual a ngaidan nei ihiu em? Loi upate khat in la piangthak tai ei ti ziak uh ahi em le? Naungek(infant) khua henailo ahiloleh piting baptisma tui vat khat vat ni Pastor ten a vak the(sprinkle) khum akhun Piangthakna um ihisak khak khatto uh ahi khatawl em le? Pathian apat piangthakna vang mihiam pilna hilchian zaw ding gual ei puai. Hui(wind) chu muthei ahipuan hinla hui in anawk khakna chu hetthei ahi zia gual chun Pathian apat Piangthak te chu amau a Thagau Thiangtho ga (fruits of the Holy Spirit) chu muthei leh hetthei ahi. THAGAU GA leh Thagau thilpiak(gifts of Spirit)hetkhen ding ahi. Mi Piangthak, Thagau chenchil (Filled with the Holy Spirit) hetchianna(evidence)chu pau hetlo a mok ki koko a, asuk athang, adung-avai ah kichop vel lumlet na ahi puai! Van pau ka thawh ahi tia ki thagau neisak bikte khu amau leh amau kithem ahiu hi. Pathian nei, piangthak dik tak Thagau Thiangtho chenchil umzia chu Pathian leh a Thu hepi (love God and His word) chuleh a lei taksa sualna ziaka lunggil puakkek(broken heart) te chu ahiu hi. Thagau Thiangtho chenchil te chun Pathian huat te ahuan’ Pathian zakda te abawllo ahi. Pawl khenkhat ki zilsakna lungkham um mama khat chu ahileh khatvei bek Thagau chang ding, zia thagau achang tak ua leh pau hetlo a pau ding, khua helo a um ding tite ahi. Zia gual a umlo(thagau changlo) te chu Khristian dik tak hilo, piangthaklo gual in a kawi ui! Zia gual ding achun Bible in ei genlo ahi. Hukdam ihi hun apat in Pathian Thagau Thiangtho chu ei a cheng zing ahi tai!
Music leh sound system hat ziak ahem, khuang git hat ah Thagau pawlna changgua kizilsakna diklo chiapi pawl le atam ahi. Thagau zalen-Thagau zalen lo ti gen ching te apat pilvang ding ahi. Thagau Thiangtho chu Pathian ahi. Mihiamte phasak dan a munkhat a hentup leh tha zalen thei ahi puai. Thagau chu a zalen sa zing ahi. Kuama control na nuai a um ahi puai!
Bible chawpkan Ki thagau misak dawi leh kauthu buaipi,(occultic and witchcraft) thagau buak leh khanggui hansia(generational curses) leh damlona chuam chuam apat damsak thei kiti zawlnei mitthum hung pung deu deu ding ahi.
Piangthak khat chun Pathian a hepi teitei in, Pathian hepite chun Pathian thu azawm(obedience) un ahi. Pathian hepina leh a Thu awina ding achun mundang-gam dang hawl ngai ahi puai. Pathian Bible(Scripture) in a um hi! Thagau Thiangtho chenchil techun Pathian Thu a ngaikhawk un chuleh Pathian thumatna leh Thiangthona(Holiness) a del zing ui.Khristian Bible ngaisaklo kiti um thei chi ahi puai! PATHIAN THU ngaisaklona ziak in chiasual pawl kitam ta ahi. Groups leh ministries chuam chuam, ki phuakkom te haw kizilsakna leh chiapi dan uh lungkham um, Bible tawh kituak mamalo tam tak a um hi. Tum lam gam( western countries) haw biak dan hawle mawk ettawn ding hilo ahi. Bible zilsakna nelsia takah khawvel thil leh taksa thanawpna suk piting nading a pawl kibawl minthang mama tamtak um ahitai. Tulai Khristian laa kiti khangthak ten a ngaisang mamau teu le Bible tawh kituaklo setan kipakna laa atam takzet ta ahi. Social media chuam chuam a Khristian challang mama zilsakna diklo chiapi apat le kiven phat ding ahi. Khristiante Pilvang hitiu e!
Lungchang thak(a new heart) Pathian apat nei, Pathian in ei pia tak tak eina em ti ki ngaitua thak hitiu aw. I Kristian nau hi ki enthak kit chiat hitiu, Pathian hetlo Christian ihi khak ding uh lungkham um mama ding ahi. I dinmun dik tak uh , i Thagaulam dinmun uh hi a THIANGTHO, a THIANGTHO a THIANGTHO Pathian mu in banggual in kidak a um diam unau kingaitua tiam in! Thagaulam lam dinmun uh khawksakna nei taloin, taksa dawina lam(desire of the flesh) kipawl khomna leh thugennate i del vel vel gam tau hi. I dinmun uh dik tak gen ngam leh khawksa leh pawna taka ei gente chu i hua zaw tau hilo maw? Pathian thutak gensang in mite thawnopna pui, tawt bawl thiam, zuau a mi kipaksak ching thugen thiam itam tau a, akhawk mama ahi. Pathian lunglam, Pathian kipakna sangin khawvel mite pachak ah minthang gua itam tau hi.Taksa lam beplo in Thagaulam angkom leh nawchizuak [Spiritual adulterous and spiritual prostitution]Christian minpu himai talo i hiu em?
2 KHANGTHU 7:14
Ka min pu ka mipite a hung kingaitawm ua, a hung pauchap ua, ka mêl a hun hawl ua, a nun siatnau lampi a hun kiheisan phat ua leh, van ah kipat hun ngaitha’ng ka tin, a gitlonateu ngaidam in, a gam uh hi’dam kit ding ka hi
@GL Muana
Bible Sim ding:
John 3:1-21
Galatians 5:22-23
1 Peter 4:10
2 Peter 1:3
Mathew 22:37
1 John 2:5-6
1PETER 1:16
Hebrews 12:14-15
Rom 12:2
Hosea 4:12
1 Corinth 3:16-17
1 Corinth 6:9-16
Nehemiah 9:13-17
Ephesians 2:8-9
2 Corinth 13:5-7
2Timo 3:16-17
2 Corinth 7:17
Psalm 34:17-20
Isaiah 6:3
1 John 4:7-21
Rom 5:5
1 Corinth 12:11