SAWM-ZUNCHE/ SAWMGIAK KHAWM
-KL Muana Khaute
Kum tam tak liam ta maleh SAWM ZUNCHE/ SAWMGIAK kiti hi a diak in Vaiphei te’n nidang lai deu achun ala chawichîng ma ma sek ui. Zia chu ahileh khuakhat chengkhawm tangval hawn khat in-khat ahiloleh KHUALBÛK khat a zan phat leh a giak khawm sek ui. Zia hun tak chu leh tuanthute, khawtang khantona dite genkhawpna, kipawllimna zu leh sa nek khawmna, nungak tangval chanchin genkhawpna-te, khua leh tui venbit di dante thil pawimaw chuam genkhawm ding in a giak khawm sek ui. Zia chu sawm giak a ti sek ui.
Zia hunlai achun sa leh gal, veng khat leh veng khat ki do ahiloleh kisim tite a la chîng sek un, zia buaina te lak apat chun a kikul khawm sek un, in-khat in nungak tangvalte a pawimawi dan zel in a giak khawm sek ui. Khuakhat leh khuakhat a la kisim in kido sek maleu, khuakhat a chengkhawmte a kingaina mamau a, bangkim in a kipanpi tua sek ui. Ahinla, a phatna tam tak a um lai inle a phalo le a chang leh a um tho sek a bang hi. A phatlona khenkhat leh zi leh cha kilak tuana a tam ziak in a khawvel munau a neu ah, chuleh piangphung inle miphak lana leh khuadang ngainepna a lian hi. Zia beplo achu thisan kinai talua ngen kicheng tua ahimai tak ziak un, mihiam taksa lam, suan leh pak leh khantona lam in a basam ma mau ahi.
Khuakhat munkhat umkhawm leh ngaidan kibang deu chiat chengkhawm leh zi leh cha kila ahiziak un a khawmunau a neu a, bang hem ti amau sung ki hiatthiamlona a um khak chun a sung buaina hi anasa ma ma a, midang gal nei sang in gal lau um zaw ala hisek hi.
SAWMGIAK khawm a phatna tam tak a um ah, amabo, a siatna le a um tho hi. Mi tam tak in-khat giakkhawm a hiu a khat in thil ahi khel a leng ua thiamlo chansak mai a hiu. Zia bep chu hilo in, mi khat in zun a che leh a giakkhawm zosia zun che dan a ki kawi mai sek ahiziak un, nuizat a um chang le a um sek hi.
Hun masate kha a chang leh ngai in I thil vawng vawng ah, lunglen-chang bang le I nei sek hi. Abang chu hitaleh, masawnna kalbi palto I hinau ahin pilvang tak leh siamtu’n ei guan piak malam I hinkhua diu hi gintak leh siamtu lungtup gual ah kalsuan chiat leu hin malsawmna hawitak in ei lamtua ding ahi.