Review: VAA ZAILA AWARD 2021 By: Kamlianthang Vaiphei
Kanam Vaiphei
Review: VAA ZAILA AWARD 2021
Vaiphei khangthu zaila tawh kisai ah ala kibawl khalo, tuchungah amasa pen dingah Vaiphei Artist Association (VAA) ten VAA ZAILA AWARD 2021 ahung bawldaw uh hi kipakpi um mama hi. VAA ten Organising Committee bawldokin, ziate chun category chuam chuam ah teldaw (nominees) kaikhawm in, category endik ding zaila leh pau lam ah thiamna neite a guat uh ahidan hiat ahi. Amasa pen ahi ziakin, a tinlouna leh ginchak sangah a bawlhoinateu ala enkhawm hitiu.
NOMINATION: Amasa pen ahiziakin a hun hi tiam umlo hileh a kilawm hi. Khanglui lai lampek apat tulai takah chialai te tekhawmin a um uh ahi. Zia ahin a kim thei dipen ah sai maleu, nominees ah hiatkhial chu um dingin ginchak ahi. Tu amasapen kichai ata, akit phatleh Legend Award tilou adang chu a hunbi (timeframe) um thei ta dingin ginchak ahi. Zia chu hileh zaila awitu, phuaktu leh gimawi bawlte adingah masawnna leh kitilkhouna hoitak hi ding ahi.
LEGEND AWARD: Hun haksa leh hun nuam ah zaila eila awitu, amau khanglai ah lawman/award haw bawl ala hilo, tuchung ah Legend award ivak siamdaw uh hi kipak um mama hi.
STAGE: Tuchung ah stage design a etnop mama ziangah, ahinla, stage pakhat bep ahiziakin, lasa dingte kisak sung, track kipiak tua, DJ te kisaksung, instrument mang utte adingah hun tampi a mang hi. Zia buaina sukvenna ding achun mun awng (open space) hihenla, stage neu pathum bang kinei theileh, performance nei dite co-ordination hoitak ah bawl di, hileh etlawmin, hun matdan le kitup diak ding ahi.
LIGHT AND DIGITAL DISPLAY: Tuchung lighting leh digital display vang lungkim a um khop mai hi. Ahinla, ziasangah hawizaw ah bawlthei didan a um hi akitphatleh.
AWARD HAWMTE: Tuchung ah Award hawm dingah namdang/paudang thaw I vak chial ukhan I nam changkanna I etsak ban ua, relation siamhawina phatak ahi. Award pedokte kicheina, hun matdan hawleh a kitup mama hi.
COMPERE: Tuchung ah compere teleh a tulai ah mama tau ahi. Gending leh comments haw anal thei mama a, a kitphatleh open space ahitheileh, mipi lakah vak vel theileu hung nal zaw diak ding ahi. Tuchung ate beplo, a kikhopna zil ah hunvoptu te hileh kizil tou zel leu hin I kikhopnateu hung etlawm touzel ding ahi.
LIVE TELECAST: Tuchung ah VAA ZAILA AWARDS in zia gual ah publicity a mu hi live stream ah YouTube ah etthei ziak hi ahi. http://Getinlamka.com te kipiakzawna ziakah mite mittai leh bildaw law ahi. Cameramen tele professional mama tau.
SEAT ARRANGEMENT: Tuchung seat arrangement kha Covid protocol haw zui ziak ahi diam, doigualin a bit zolou abang hi. Open space ah I matthei ahichun, fans leh mipi adi lamtual siam ding, usher kitup takah koi ding, nominees leh VIP te chutna di siampiak thei hileh. Seating arrangement chu stage pathum lam ettheina dingah siam ding hileh duthusam ahi.
FINANCE: Thil bawlna zosia ah poimaw chu sum ahi. Eilak ah tawmngai ah ituak pen hi thuchuam hileh, Advertisement bawl nuam local hileh state level ah hawl hileh, ki zawl khawm theileh I programme le supiting intin, summuna hoitak le hiding ahi.
A pumpi etin VAA ZAILA AWARD 2021 hi a lawting leh ki thang atpi a um mama hi. A lawtingna dingah gim leh chawl khawksalo ah tai VAA te, Organising Committee te pakchat a um mama ui.