12th Feb 2025 | Kanam Vaiphei
Pa Lianthianlal kum 33 s/o Tinzalun tule tu Ngathal KSP kochuam aum chu Date 5th Feb 2025, nitak dak 9pm tuam a kua hikihe lo Bolero kang khat in New lamka lampi ala phutkhak chu kintak ah phachuam ngai ten Lamka Damdawi In tut ahi nung in tuni zingkal dak 8:30 tuam vel chun anat na thuak zotalo in Lamka Damdoi in ahinkhua ala beitai.
Pa Lianthianlal 33yrs hi nitak a Inlam zuan a chi alai Rayburn High School mai, New Lamka lak atun a kuahi kihelo Bolero kangkhat in phukha in ama chuam na Activa phukek in kin tak in zia gari chun atai san hi. A gei tuam aum ten husa hiat ahi phat in kidelhuan in Pa Lianthian panpitu bei a thisan naisan taw lampi kizam chu phawng in Lamka Damdoi in ala zawt piu hi.
Zia mun achun Bolero gari mai-partkhat le ketha chawm khawm in ala um a, mi tawm ngai bangang zat hem in Gari matguan del zui himaleh delphak ahita puai. Pa Lianthianlal kisuk khak hiat ahi zanzan in YVA Gen.HQ in delzui in, Lamka damdoi in a panlak thei na kawng in pan ala pan ui. Azing a YVA Gen.HQ malat na FIR Police station a ziklut ngal hi in, New Lamka Teddim Road dung a CCTV et thei cheng sui zuina ala um hi.
Aki sukha damlo hin liamna nasatak tuak ahi ziak in, Thisan apawt zing hi. Lamka Damdawi in a kintak a Operation patding guat himale a kisukkhak na ahuaisiat ban a, Thagui tamtakle sukha dinmun ahi tak ziak in, Lamka Damdawi in a bawl chu thilhaksa ahidan Doctor te a pat hiatsak ah in ala um hi. Hospital lian zaw te a bawl ngai ding dinmun ahung um ahi phat in, LM Khaute MLA,Lamka kiang ale thilumdan hiatsak in ala um hi. Aman le akin theilam a Airlift bawl apuak ding guanggal fel ahi lai zing in tuzingkal chun damding ngaicha Lamka dawmdoi ICU lupna a in sung ngai cheng nusia in ahinkhua ala beita ahi.
Tu zingkal dak 8:30am a YVA Gen.HQ leh Insungmite kihokhawm na ah thupuk na dung zui in Pa Lianthianlal lungdamsa chu ICU apat kila dawk in, Postmortem dan bawl zaw ahi nung in a chen na Ngathal ah a Inlum puak tun in ala um hi. In lam a mipi ama ngaina taikhawmten Lamka Damdawi in apat hung ki paw tung alungdam sa chu ala vaidawn ua,Kuchuamte programme hun mat zaw ahi in VCC Thanmual a vuiliam in ala um ta ahi. Ama hi tule tu YVA Ngathal Unit ah Executive member chuleh May 18, 2023 ah VVC First Batch training ala chai masa te lak ah khat ahi ziak in VVC Lawiupa ten le aseppiu sun tak kawm in alungdamsa puandum in ala khu ui.
