Nisin Thuhiltu leh YVA General Headquarters, Presidential Candidate holimna
April 2, 2022 leh Young Vaiphei Association (YVA) GHQs Presidential Election 2022 umna ding ah Presidential candidate ding ah nomination file mi 4 te’n scrutiny a zaw tak dungzui un, Nisin Thuhiltu in candidate-te holimna a kineipi a, zia chu a nuai ah gual ahi.
Candidate min: H. Sangpi
Pa min: Upa Thangkhankap
Address: D. Phailian, Compound Veng, Churachandpur
NT: Nisin Thuhiltu
HS : H Sangpi
NT: Chawmkim tak in nang leh nang la hung kigenchian thei diam?
HS: Kei ka hi le, H. Sangpi. Ka pa min Upa Thangkhankap, ka umna ahileh Compound Veng, D. Phailian ahi. YVA ahi’n 1987 apat in Unit in ka lasemto a, 2016 apat in YVA GHQs ah Vice President in ka la pang a, tu tiang ah Vice President panmun lua zing nalai ka hi. Tu-leh-tu ah YVA GHQs President candidate khat ka hi.
NT: Bang ziak ah YVA GHQs President hiding lunglut la hi em?
HS: YVA GHQs Vice President ah term 2 sung ka la pan hun sung ah sep leh bawl ding tamtak ka mudaw ziak in, ziate chu sepdaw ding ka nawp ziak ah President hiding lunglut ka hi.
NT: YVA GHQs President role hi nang mimal mudan leh ngaidan ah banggual ahi em?
HS: Masang ah YVA GHQ President te haw panlakdante haw tuni tiang in ka en in pha kasa, kei ngaidan ah genthei liangvaite sawmdawlna ah malatu pen ah pan ding chu President role hipen mai in ka kawi hi.
NT: YVA GHQs President khat in kituptak ah nasep thilbawlna a neitheina ding in bang poimaw pen in la gel em?
HS: YVA GHQs President khat in kituptak leh hattak ah pan a laktheina ding ah poimaw pen ah ka hiat chu, Block, Unit leh mipite’n backup kituptak in kibawlthei henla, a hiatlo te’u le YVA ngainatna zal in kikawkmu thei zel leh ti poimaw pen in ka gel hi.
NT: YVA GHQs kivaipuakna pha la sakpen leh pha la saklo siamphat ding ah la dawi pakhat gel la hung gen thei diam?
HS: YVA GHQs kivaipuakna pha ka sak tampi a um a, tampi lak ah pha ka sakpen khat chu, punctual tak ah hun mat dik hi pha kasai. Pha ka saklo khat chu meeting ah thupukna khawtang in a hiatlo dingdawl khenkhat khawtang ah thezak ah a umsek chu phalo ka sai.
NT: YVA GHQs in a chiapi ding ah la dawi, promote la bawl nuam bang a um em? Promote bawl ding hile chun, banggual in la seppite promote la bawlpi diam?
HS: YVA GHQs in a chiapi ding ah ka dawi mama khat chu, blood donation lam hi kipibawl leh ti ka dawi a, zia promote bawlna ding achun, Block leh Unit-te haw leh mipite lak ah blood donation poimaw dan campaign bawl mun ding, zia campaign bawlna hi YVA Joint HQs, Imphal toh kithua ah panlak hileh lawting thei ding in ka gel hi.
NT: La seppite banggual in la tilkho in, la suthatho zing diam?
HS: Nasep thilbawl in a mala’n pang ing katin, a thatda hun unle I sep I bawl hi thilpha ahi, I nam leh YVA a ding ah thilpha ahi ti kha kawkmu zingle’n, I member chanpite le thatho zing thei ding un ka gingcha’i.
NT: La seppite active lo mama ahiloleh poor performance nei umta leh bang la law diam?
HS: Member active leh active-lo ti hi, khawitak organisation hi’n society hitaleh a um mawng ahia, member zosia hi active theilo ding him in ka kawi a, ziana ding ahin, member a tamthei lam laklut ding, zia lak achu a active-lo a umtak inle khawk khamlo ding in arrangement kibawl leh ti chu ka ngaidan ahi.
NT: Mipi hotu/puitu hina dawl ah masang ah la experience haksa la sakpen bang ahi em?
HS: Mipi hotu/puitu hina dawl ah ka la experience, haksa ka sakpen pen chu, mipi a ding ah tawmngai tak ah theitawpsua panlakna I neina chung ah I panlakna hechianlo ah kimawk dem ziang ti hi mihing hi’na dawl in haksa kasa, ahinlah puitu hi’na dawl ah kidem ti chu a um ding mawng in ka kawi hi.
NT: President hile chun nang term sung ah la sepdaw teitei ding thil pakhat la hung gen thei diam?
HS: YVA Block hi a tam nai pua, VPC Block hawnna zosia ah YVA Block hawn ding, Block I hawn le Unit hung kibelap inti’n, I mi I sa le hung kibelap intin, YVA le hung hatsem in ah ti chu ka lungtup khat ahi.
