*MIHIAM TE HI BANG IHIU EM*
Siamtil Bu I et chun Pathian in khawvel ah thil um zosia te a siam in hawi a sa mama ah, a lungkim mama hi. Zia a thilsiam zosia te chu a enkawl ding in Ama kibatpi mihiam te chu siam in mawpuakna apia ahi. Khawvel hung chiazel in mawpuakna lakdan kibang lo in khenkhat te’n zia mawpuakna na chu sep leh bawl gual ngei ah a ngailai un, khenkhat in hinna natiang thunei khum gual ah thilhing te a etkawl ziak un mangthai deudeu leh suanmang hunkhawp tak a um ta ahi.
Zia Pathian thilsiam thu leh a etkawlna lam thu ahin theologian leh gingtu khenkhat ngaidan leh mudan kibang lo um theisek hi. Psalm 8 na a chun, mihiam te hi bang a hiu ah, zia gual lawm ah akan thak hi, Ama sang ah nuai nung zawdeu in a kawi ah, vanchung ah thilhing umte, tuisuagiat nuai ah ganhing leh lei chung ah um gancha te zosia chung ah thuneina a piakdan a sulang hi. Thilsiam te chung ah thuneina hi mawpuakna ah la in, a phachuam zaw ding ah mat leh etkawl chu khawvel damna hingei ding ahidan kawkmu in I um uh ahi tilo thei ahi puai.
Chun hinna nei zosia te, thaichi lohing, nek thian leh thian lo ding tiang ah a khenpiak sa le a um hi. Ahinla, ziate chu kigen kim zo lo ding ahiziak in, a etkawlna lampang zawk ngaitua khawm ding in pha kasa ahi.
Pathian thilsiam ganhing, gancha, lohing leh thil chuam te sumangthai mai ding ah siam aki hilo dan hiat a pawimaw takzet hi. Nek leh dawn ah mat di leh a thilsiam te supung ding ah ngansia I hi zawkna’u hi ngaitua thak a ngai hi. Chungleng va te, tui nuai ah khawsa ganhing te, mual leh tang ah thing leh thai te nek leh chak ding in lul tak ah etkawl hi Pathian in mihiam te mawpuakna piak ah ngai hi hawipen ding in ngaituana a um hi.
Pawimaw na ten ten um lo ah Gu (poison) mang ah sa leh nga mat, mual leh tang ah ganhing chitin thisak, mei ah hal lum ti te hi mihiam te a ding ah thil phachuam lo tak ahiahi. Zia bep chule hilo in tui leh hui a sutawm ah, mihiam te damthei na ding ah le phachuam lo te haisan ah chiapi thak tawh I gam leh guau hi hing singseng ah siam thak hi I mawpuakna’u hilo di ahem ti hi mitin lungthim ah ngaituana thak hitaleh ut a um mama hi.
Zia Pathian thilsiam hawi taktak te vengtu leh siampha ding ah mawpuakna kipia te hi su piting kawm ah lungthim thak tawh panla chiat hitiu. Zia hin taksa leh thagau hinkhua damtheina leh lawtinna hi ngei ding ahi.
*@KL MUANA VAIPHEI*
