MALZAWLNA HIAT KHEN THEI HI LIMNA LEH GASUA NA AHI
-KL Muana Vaiphei
Pathian in a thilsiam te hi vandai tui in a chawpno sek a, gapha- chipha, suan leh ga chi chuam chuam a hun hun in mihing te a hun chin daw sak a, khawvel zem hawi tu leh mihiam te ki vakna leh inchen lochen siamna leh limna’n a zangvuk sek a, damlai khawvel nuam tak in amang un, siamtu chawihawina’n a mang sek ui.
Malzawlna gensenlo leh neksenlo zen in ei malsawm sek a, malzawlna dik leh hiatkhenna chim tak I neilo ziak in, ama malzawlna tamtak te ziak in khutdaw in genthei ngawi ngawi in I um thei ahi ti hi hiat chiatna I nei ngei diu ahi. Chuti chun, malsawmna hin suak ngawngkawl gik tak siam leh ei put sa ei siam piaktu ahung hi nuam ma ma hi.
Malai a pu te chu zotuithiang leh huithiang in a malzawl sek a, nek leh dawn in kiningting tak in I la khawsau ahi. Pathian hetmil ni ahung um sek a khawvel dawigual in I khawsa sek un, haksana leh buaina I tuak khawlaw sek uh ahi. A chang in Van mana te, vachate leh nek kiningting tak ah piak hun a nei chang uh, du- amna ziak in I buai khawlaw sek uh ahi.
Pathian in mihiam te lei leh malzawlna a la zang vuk sek a lopi leh lawtinna a la chang sek ui. Himaleh, khen thiam theilo gual in sualna khawk tak leh puksiatna a hun zui sek a hi, zia chu siat huaisia tak ahung hisek a hansia I dawng sek uh ahi.
PS. 23, Lalpa chu ei chingtu leh vengtu, bangkim ah ka kiselna bep hilo kahinna ei siamphat piaktu ka bangkim ei malsawm tu ahi. Thil bang kim petu, a bul leh tawp gual a gingtu te kingakna leh bitna kulpi ahi. A ma kipat in panpina ahung ki pan hi, PS.121, lei leh van apat hin mihiam te a ding malsawmna bukim ahun kipan a, tawp hun neilo in a zang vuk ahi. Mihiam hi bang a hi em?hiti gual lawm ah lei ngai thak leh kan thak hi a lopi in amak ahi ti ala ti hial uh ahi.
Tulai ziang inle Pathian in a chate hi malzawlna , hausakna pilna’n a zangvuk sek a, I kipak ma ma sek ui. Ahin malzawlna pha kumtuang dai ding tawk khawvel a mangthai mai di te, I het khen theilo sek ziang Hina ah, thankhuk a lutpi leh mangthaina’n I mang sek uh ahi. Khaile, Pathian thil thawn piak te hi khen dan thiamna leh pilna ei hun peta hen. Chuti chu, malsawmna chitin tawh siamtu kiang tung thei chiat ding in Lalpa’n ei puizel ta hen.