LUNGTUP GUK NEI LO KUA A UM EM:
-K L Muana Vaiphei
Pathian thilsiam te lak a lul pen chu mihiam a hi, a ban in a ma lungtup siam sua dinga guat leh kineppi chu a hi. Ahivang in siamtu lungtup leh dawi dan helo ah, ama mimal gel dan dan chiat sem hi a za-ah tam zaw ding in ginchat a um hi. Male a lungel uh ngak in a hun tiam tàwpna ni chu kinem tak tak in a-ngak ham ham ui, a huntiam chu hun asak phat leh mithiangtho te lak khawm ni çhu hun tung ngei ding a hi, zia phet chu leh kelnam leh belam nam chu hung khen ding a hi ,bang nam a pang di la hem tu hun a hin I ki ngai ngaitua a hun tak zet ta a hi.
Mihiam zosia hi Pathian asiam Pâkiang tun chiat ding in a ki ngaitua mai thei hi,mihiam mitmu a thiangtho siam te dawidan zui te lak a Pathian pawmtak hilo tampi le a um um thei ah, khekhat te chu Pathian mittung lo a hinkhua mang le a um thei hi, Meithai nu ki ngâi-tawm tak Pathian kipak na ding le um intin sempha ikisa ma ma siamtu mit-tung lo tampi le um thei a hi ziak in, Pathian leh ikal adik nam ti ki vel thak chiat ngai tampi um mai thei a hi. Kuale Pathian pawmtak hi ding in siam tu tawh iki timat na adik nam ki enchian hitiu achu ti lo chun agim thawn leh aki nemthawn hi kha pangpal hitiu.
Mihiam te hi lungtup nei chiat ihiu a,lungtup uh chu adik bukimlo le a um thei hi , zia te chu khen thiam leh suk dik hun a um nalai a , ahun pet a suk dik chu khawvel lam a le lawtinna hung hi ding a hi ziak in, a hun aum pet cha hi suk dik chu thil pha leh mawzawlna hung hi ding a hi ziak in, nakhang nei chun he chian ta hen, zia chu Pathian chate sep dik di a hi. Ilungtup leh ilung gel hi eiman pha isak lai in a phalo leh adik lo um thei a hi ziak in, kigel chian hun sung a hin Lalpa’n dawitel na hun ei pia,zia eima sia leh pha ei piak na hun sung a hin sutuak hitiu in, chapo na ki dawitawkna na hin lampi phalo ei zawt pi nuam na lampi mama a hi.
Lungtup leh kinepna a ki nei chiat ah, tamtak te a lawting ui, zilna kawng a,Inchen louchen kawng a te, hisel na lam a te,hinkhua kipakna te leh malzawlna chichuam chuawm a te chung chuan na leh vangphat na te a chang thei chiat ui.Zia haw zosia te hi Pathian in mihiam te gochan ding a ei guat piak a hi, zia te chu chantawk a malzawlna ichan lo chu bawl khel khat nei ka hi ti ki he dawk ah,I ngaitua khel leh ibawl khel na te kigel dawk in, malzawl tu kianga kisik ah, ngaidam dawn leu hin malzawl a um tei tei ding i hiu.Zia Pathian thuguk chu he dawk in ama kianga dawn leu hin mi dang te gual a hinkhua mang chiat ding ihiu.Lalpa la mal- zawlna go la phum guk hi a chang thei dinga ki lawm te ei malzawl ta hen Amen.
Mihiam zosia hi khawvel hawina leh lopi na hi chan ki lawm chiat dinga a piak sa ihiu ah a lalut- adawng sawn di te a dawn dan thiam a mat dan thiam leu hin khawvel zem hawi tu a hi ban in, Pathian kipak in tin, lei mihiam te lak in lemna leh muana um intin hepina nun in khawvel mang chiat leu hin, siamman leh pian man um tan tin, tichun chuailo pak gual in ei zem tan tin, tawp thei lo hepina puan a tuam a um in, lungngaina leh buaina pel in chung lam mite tawh leng khawm tai tiu in Halleluia la sam in dial dial in diam diam tai tiu aw le.