LAWI-UPA KITÊL GÂ BUKTUA NA:
-K L Muana Khaute
Vaihawm tu kiti hi, chi tampi a um a, Khawsung leh khawtang vaihawmte, ginna lam a vaihawmtu leh a dang tampi a um ah, tuni hun a, kagen nawp pen chu khawvel politics a vaihawm tu ding ki tel na ah, a pha leh a phatlo na um gelgel a hi na chung ah, kitelna pha leh gàsua leh khantona leh lemna siamthei tu lawi u pa itel thei na ding ua ka hiat dan suklat ka nuam hi.Ilunglam a hi chun, pan lakhawm in lampi dik leh thutak chu din pi ding in kisîngsa hi tiu.
https://g.page/r/CbM-fuZxzB3nEBI/review
Khawvel a dam ah, eule Idam zel ua le chu, kitelpi na MDC,MLA leh MP kitelna chu Ihiat lokal un, hung tung kit pai ziang ding a hi. Kitelpi na Mizoram state leh state khen khat chu tha tamlo zaw leh hung um ding a hi ziak in, thawm a nei pan tau hi. Ei Manipur ziang ah hile bang hem a ti chun panchayat/ municipality leh MDC hîle tukum sung a hung um thut thei in a ki lang viat viat ta a hi.
Zia kitelpi na hung um dinga hin party chiat chiapi ding maw a hilo le chi leh kuang a chiapi di maw, a hilo leh sakhua dan chiapi ding ti thil ngaitua um tak khat chu a hi, etsakna’n UK, USA gam leh a dang khenkhat hi party a chia thei ua a hinla gam khenkhat thagum a vaihawmna chutpha gam tampi a um hi, zia te hin mipi thuneina a nak sak puau ah, a mau dawidan in a mau thu thun vai a hawm ua, mipi zallenna a pia-puan mihiam khat leh khat kibatna a khen ah, kituak lona a siam hi, gamkhat mikhat vaihawmna a chia mai sek hi. Za gam sunga Cheng te chu democracy gam a ngaichau ah, amabo,a mau ngaichat gual in democracy gam hile zallena a tam ta puan, sakhua lian leh chi leh kuang tamte vaihawmna le a hung hi thim ta a hi.
Kitelna a hung nai phat leh manifesto hawi tak a hun paw dawk ua, gam sung organization te chun, tuchung lei vote tin ua leh zia chu,zia kha hun bawl piak ding ka hiu ti-in a kitiam/sam sek ui, a hinla I hiat phak tiang kum 60 sung a hin party or mimal representative ten chi leh nam a ding a kumkhaw go ding a tep sau a piak uh Ihe nai puan, mule Imu nai puau, himale Election hung tung kuang tak le party a hem, kua sum leh pai a hem ziak in mipi leh lawi upa te tam tak in puk kit diam i tiu in, Ikinepna gam tum chu a hàwm in um kit in tin, ei them kit tau hi maw ti in, kisik kit zel hitiu in, I gam ngei ua le hun sawt lo nung in refugee hung hi tai tiu.
Election hun a hung tun phat leh In kuan le sum leh pai leh thunei nawp ziak in ki khen law zel hitiu in,I nam leh I kochuam tiang le hung khawi ling in, I ki mudan leh ki engsiatna leh ki muan maw nan hung dim in tin, I ki tuak kit na ding kumpi hung ngai kit in tin, I melma ten gamla tak in ei tai khel tan tin uh, del phak guan del leu hing le del pha talo ding i hiu. Zia ziak a chu vaihawm tel na ding in nampi kikup a Pathian dawng ah, a ma lemsak tung ding thei ta ding kising sa tai tiu.
Hotu ki telna hi Inam leh Imipi te kisiatna ding hi zaw lo in ki lemna leh pankhawp thei na a hun hi a, siamtun a chate haksatna,thawm hauna leh pawimawi a he ngal a, A man a chate dawi leh pawimawi chu hun pia, ngei ding a hi. Zia ziak a chun gam leh nam chu Pathian siam a hin, A man a hun tak le Zomi te chu gam hun pia ngei ding a hi ti chu ka kinepna leh ka pauchap na a hi.
