LAWI UPA DIK TAK CHUN AMA HI NA NUSIAN AKI PUMPIAK DING AHI.
By: KL.Muan Vaiphei
Mizosia hin lawi upa din mun a lua thei ui amabo, Jesun a nungjui te kianga “A Lian pen hi la nawp chun a neupen te thunui a um un” ti ahi gual ngei in ama Jesu ngei Khan le a nungjui te keng a sil piak ahi. Zia gual bawk a chun lawi upa ihi chun isep pi te lung ihawl a ngaidan, dik lona a nei teu le Nial kal pai lo a,awl a thudik lampi I thunun zaw guat di ahi. Thudik a I chia pi zawlo te chule amau ngaidan chiapi phawt leu aphat lo dan uh hun khat hun he dawk in tiu in,thudik a puitu chu awl in ahun jui kit mai sek ui. Chutia thudik a tawp tiang a dik lo ahi jia ki he dawk thei lou chu mi bang lo deu a ngai thei ahi tang pi hi.
Hotu te hi Pathian leh mihiam te tel ahiu a ,teltu dawi dan leh phat sak dan a mipi a puithei lou chun a kingaitua thak a ngai a, puitu ding a guat te lunglam ahawl ban a,mihiam hi bukim Jo lo ihi jiak in nguntak a ki ngaitua thak a phai, jia bep chu hilo in, a vaihawmna leh a chiapi chu a dik lo dan leh adik dan mimal tak a a HILCHET di ahi. Chuti chun kuama thudik jui nuam lou um lo ahi dan he dawk thei intin ama ngei in le ki siamphatna a mang khawlaw thei hi.
Zia gual a Nialkal tu a um lai in le lungthuai leh kangbawl mai lou a,amau lungput leh dawidan le hiat dawh thei hi hotu piting te lawtingna thuguk chu ahi. Bible in ei hil gual a melma te hi muda mai lou a,thudik a I puilut thei na ding in kingaitawm tak leh ngil nei tak a lungpi put a Pathian pilna dawng jing kawm a I mawpuakna haksa ma leh paw ham leu hing ilungtup u chu hung lawting in tin,ei taksanglo leh ei jui nuam lo ten le a tawp le ei hun jui mai sek u ahi. Abang hi ta leh gual zawna chu ei leh ki thunun na leh Pathian taw tawn khawm jing leu hing khawvel a ZAWLO him him a um puai ti ki chian tak in I mihiam hinkhua khualjin lampi ahin I he chian thei hi. Abraham kha le a zawtna ding ahe puai himahleh Pathian in a sawl na gam chu tung ngei ding a agin chak jiak in haksatna tam tak thuak pum in a zin tun a,a gin na leh a tupgu na jiak in Canaan gam a mipi te a lut pi ahi.
Chun,lawi upa diktak te chu ama leh ama aki taksan di, chuleh a seppi te le amuan ngam di a hi. Ki muan tuana a um lo chun thil bangkim lau thawn na leh ki ginlelna a dim a bang ma aki sem tak tak ngam puan I sep sun sun le dipchakna leh lauthawn nan aki dim a bang ma aki lawting zo tak tak zo pua chuleh I nung jui ten le thitiang a gin um in ei sep pi pua a,lawtin na tak tak a um thei puai. Zia phat chu leh lawi upa tak tak ihi na amu lo jiak in, hotu tak tak in a hung ngai thei puau hi. Zia jiak a chun hotu hi ding chun I lawi leh pai muan na, lungsiatna, panpina thichil hepina, ginumna, hansanna leh Pathian umpi na I nei a ngai hi. Zia gual mizia chu I nei phat le hotu ahi na ei chet diu ahi tichun, Hotu dik tak hung hi di ihi.