Kua dang ei puai
Thepna, dogal, melma iti hawpihi naicha ala umsek au hilam. Naksak khamlo ti ah i ngainep le, eile kheu zing un, meima neicha i khoi² le lianpi ahung hi gual ah a tawpna lam le ki buaizak khawlaw sek ata hi.
Ahung kipat ihet het akhi ala buaipi ah suk dam pai sek didan chu ahi..pilvang mama ngai ahi.
Mi dang siatna kophil nawpna lungthim in ei chup phat le i thagau mit ala mual in, i taksa pum in le alàh sek vei.
I siatna le sukkhial i sel sek nai, ahinla dip adap zing sek in hinkhua a sunawk phak mamai
I thil bawlphat le bawldik mite mu leh hetpi ding iki thatlawp gual in, i hikhial te, bawlsual te kiphuan ki thanuam chiat theile chu..
*Ka ngaidam thei mawng² puai, aloule ka dam sungin hemil ta puangka ei bawl dan lati ah um em?*
Nang in le anasa zaw ah thuk kal la ngakla tawl eh? Hun le mun lemchang hawl in lavak vel vel nalai em?
Hun le mun lemchang muta le chin bang gual ah bawl la gaw em?
Zia gual hun tunsak chu bang ahi em? kua ahem?. La het chian le, adam naklai chun mai chang ah la mu nawp lo inle, a zik thaw bek in hetsak mai tia, thipsan mai dingin ka gingcha puai.
Bawlkhial ka nei puai, ama ahiu ti ah la kelpan na mun umtei di ahi. A dik gel hi ngal ah kikal tua zing nalai chun ma sawnlo ding ahi. Mi chapo le ki thupi sak a maw gel² lahiu.
Siamphat nuam ah la dogal\suapi aki khiak niam la mu chun, nang a niam zawn lut mai tia, damna damdoi phapen hi mai ina.
Doisak na lian nei chun hun vau in hun zilgai ding ahi, kamtai le ahung maichang phat zing te kiang bep ah la um zing le la thavai na ni ding agamla ta puai.
Lang sal lo, aguk gal, kihetlo sak tak ah la siat gam tatna te khan lung muanna le chawldamna hung tunpiak lo ahi.
Bangma la sim manglo le ngaisak ah laneilo te in a hun thuhil nau ngainep kin, ahung khawtua le ngaikhok ziak ahi ti in kipak in
La thangtawm ziak, la engbawl le suk minsiat, mualpho sak nuam ziakin la dinmun mangcha kin, nisa tum in suak zel ahi.
La umchan, hindan, nunghang ziakah la suapi natna ding sukha laki chun, va het thiamsak inla ki chamna tuithiang va dawn khawm un.
La bil langkhat lam chau ah la thuhet ziakin thupukna le thutatna mawk siampai kin, mi khaw hethei te umchan gual ahi puai.
Mi dang va limsak lo ding ahi puai, ei kisuk tup masak, ki etchian a poimaw hi. Zingkal ah ha la nawt ziakin la kam namsia bei mai dingin ngai kin, a namsiat dan laki het nuam le la zi posal vak hat khum tia…zia gual ma chun mi kam namsiat dan kophil hai inla,
Bang gual in laha nawt le chin le a namsiat umzing ahi gual in, bukimlo, he kimlo, dik zozailo lahi ti kha kihet kiu kiau zing in.
A siatna, vatna le titlona he nuam ah kisiam pha nuam chu mi vangpha ahi, hin khaw lul mang ding ahi. A siatna, vatna le titlona he nuamlo, ngai nuamlo te chu hung vuai hiai hiai intiu in, a taksa le thagau basam ding ahi.
Ningkawi khat ah awgit ngailo cha kha ngaiven in aw, la Damna thupha hun puak tu himai di ahi.
