7th Jan 2024 | Kanam Vaiphei
KIPAKTHU GEN NA
Zillai General Headquarters in I nam sung ah thiamzilna lam masawn jawk sêm ding ngaitua na’n jani 4th January 2025 ni’n Tang-Gam Educational Tour project 2024-2025 nei ala hi tâi. Pathian muang ah kal kisuan in, Khua 10 ( Thingkeu, V.Munlai, Lungchuang, Phailianbung, L. Phunchongjang, Phaipheng, Tuilileibul,Maite,Munpi leh Chongkhozo) aki ve tha thei a hi. Khua Hausa/Village Authority te’n pan eilak pi najal un School authority te, Teachers te, Parents leh zillai naupang te tawh lawting takin hun matkhawm ala hi.
Zia Tour lawtinna ding ah mani kiphalna ziaka sum le pai hun thaw te chung in lunggil takin kipakthu ka gên uh a hi. Thiamzilna a ngaikhawk takjet ui ti hiatthei ahia, maban a le pawimaw na mun josia mi kiphal te pânpi leh sawmdawl jel thei ding in I dawisakna I lan uh a hi.I nam sung ah thiamzilna lam ngaikhawk I hung pûn jawk sem ding le i lam et uh a hi mimal tawm ngai hun suate.
1. Rev Dr Kh Khaizakham Rs 1000
2. Dr. Elizabeth Vaiphei: Rs. 2000
3. Mr & Mrs Jamlallun Khaute, MCS: Diesel-90 Liters) + Rs10000
4. Christina Nemlalchawi: Rs. 3000
5. Salvador T. Baite: 1 Bolero and diesel
6. Pu T Manga Ex Minister: Gypsy and Petrol
7. Dr. Soilalsiam Rs. 500
Chun, Zia Tour lawtin zawk sem na ding ah ei hung zathuap ah amau taksa ngei a pan huntawk salo in Gari leh Thau natiang tuak ah pan ei hung lak piak ‘Vaiphei Officer Forum’ lam apat Pu Pauchungnung Vaiphei, Associate Professor – Chairman malatna VOF member 5, Pu H. Sangpi – President, Young Vaiphei Association (YVA), General Headquarters malatna YVA General Headquarters member- 4, Pu Salvador T. Baite – Chairman, Zillai Education Foundation; Pu Pauneihlal – Ex-President, Zillai General Headquarters, Pu Liansong, Nk. Jessica Mawi, Nk. Christina Nemlalchawi te chung in Kipâk na a sang mama hi. Aki piak jawnau bep hilo in thiamzil naupang te leh Nu leh Pa te a ding ah thu man pha leh tilkhona thu le ei gên piak uh a hi. I nam sung ah amau gual ah thiamzilna lam ngaikhawk mamah lawiupa i nei uh hi lungdam a um ah, lungmuan le a um takjet a hi. Maban ale I nam khanto na ding pan hung la zawm jel din i dawisak nau i lan uh hi.
Chuleh, Program kimat na mun zosia ah Pauchapna hun ei mat piak Kochuam leh khawsung ah lawiupate zosia chung in le ka Kipâk nau ka hung tak lang sawn sawn nalai uh a hi. A pawimaw na mun ah taksa leh Thagau ei kaibât thei lawiupa inei thei ua lungdam aum takjet a hi.
Zillai General Headquarters in abik taka thiamzil na lam tawh ki sai ah sukpi tin ding tup leh ngim tamtak ki nei te aki sukpitin jel thei na hi Pathian kithuapi na leh I pan khawm na jal bep uh ahia, Pathian chung leh I nam mipi te josia chung in Kipâkthu ka hung gen uh a hi.
Atawpna pen ding in, Tour program hun sung ah guide ei bawlpiak Zillai Chongkhozo Block, Nek leh dawn ding ei guanggal piak Khuatin Hausa/Village authority leh Nitak an tûi tak ah ei guanggal piak Chongkhozo Hausa Pu Kamlunlal chung in Zillai General Headquarters ten kipakthu ka hung gen uh a hi. Pathian in ale tam takin hun malsawm chiat tau hen.
Zillai Damsawt hen!
Zillai General Headquarters
