*KIPAK THUGEN THEI LEH MAWPUAKNA HIAT HI APHAI*
By- KL Muana Vaiphei
Tuni I holimna di’u leh I genkhawmna ding ua a thupi ding ah kadawi chu kipakthu genthei ti ahi. Zia chu ahizing kawm in kamthiam ah, kipak taktak le hilo, mukthiam kamthiam ah, kilawmsakna kakipak ti himhim chu kipak ti theilo sang in a phazaw himhim hi.
Kua ahem khat in a phatchuampi ding ahem ahiloleh a kipak theina ding I bawl piak hun ah kakipak ti ziang thei nailo maleh, a lungthim guk leh a ngaituana khat bek chu thilpha ahun bawl piak te chung in, thilpha khat bek bawl thuk a nawp ngei ginchat a um tho hi. Midang te a ding ah thilpha sep hi ama’u kipak ziang theilo maleu, a bawltu chu a lungguk tak in a kipak tho sek hi. Zia gual achun, kakipak ti kammal leh midang te a ding ah thilpha bawl guatna’n mimal hinkhua ahin kinepna leh kimuanna anei un, taksa leh thagau inle damtheina leh malam kinepna hing ei neisak ngei ding in ginchatna liantak kanei hi.
Zia gual ah mimal, eima leh eima mawpuakna I liangko ah I kiguan ah, tup leh ngim ah I nei di dawl chu ahi. Etsakna’n, Pathian kiang in malzawlna, damtheina, pilna, hausakna leh a dang pawimaw te I dawt na khel leh I changuallo malzawlna ei zangvuk sek ah “Lalpa kakipak hi ka changuallo malzawlna chitin in lei malsawm ah ti’n kipak thu I gen sek hi”.
Ahinla, a chanchinpha puanzakna lam ah I tinlona te leh a malzawlna I dawn te’u apat thilpiak lam ah I taksap sek uh hi mihiam pawmdan leh ngaidan gual ah, Lalpa’n ei ngaita leh a malzawlna ahun piak te hi dawngtak I hina diam ti chang a tam sek hi
Zia gual dinmun a khawsa mihiam te chu I hiziak un, malzawlna ei petu lunglam helopi’n a malzawlna nawpchenna mang ah I mihiampi leh guattu Pathian hiatmil khak di chu I tawpna di’u chu tang sangtak chung ah Sakhi tuidu dangchak ham ngawingawi gual I hikhak di’u hi thil lau um ahi. jiak in malzawlna lunglam leh dawi gual a mihiam te himakmaw chu subuting in pan la sem ding ngaichat leh kinepi ihiu
Chun, a tawpna pen leh a khaikhawm tu ding in, ka hinna an ka piai, nang bang lei pe diam ti leh thilpiak ah nasem di,’n Lalpa’n ei ko peta tichun piak in um inla’u. Thilpiak in Lalpa lan zopuanla’u ti umzia hi ngaitua in khawvel leh a sung ah thilhing zosia te chingtup leh enkawl ding a ei ngansiana te leh Ama lalna ding ah mawpuakna ei piak te hi sembukim zo chiat ding in, Lalpa’n gualzawna hatna ei pe ta hen, amen.
