*KHAWVEL VAK I HIU*
Christian te a ding ah I hina’u a lo theilo chu thagau thiangtho nei hih ahi. Piangthak kahi kiti ngal ah kihechian lo leh Pathian tawh kizawpna nei lo, Christian minpu, kochuam member khat hina dawl ah nasep- thilbawl ah fel mama ngal maleh piangthak ahi lam kihelo, Pathian thagau tawh kizawp matna nei lo himhim tam mama um thei ahi. Ama’u haw chu Pathian tawh kizawp lo, chantawk ah lungawi theilo, kipakna him nei lo leh a chung ah haksatna a tuak phat leh beidawng ziang sek te hi ahi.
Zia thuguk hi I hiat theina ding un Siamtilbu bung nina I etchun Pathian in Adam a siam a khan tungman in mihiam Ama kibatpi in a hung siam ah, ahu (hinna apeta) thakhum in tichun mihiam chu mihing a hung hitai. Ziakachun, hu thakhum ah siam mihiam te a ding in, taksa leh Pathian thagau kitimatna a hung um phat tak leh kihiatchianna a um in, zia chun mihiam hinkhua in thagau nasepna akilang thei in, kipakna leh limna le a um ta ahi.
Ziagual achun mihiam leh Pathian chun thuthung a hun siam pan tau ahi. Etsakna ding in, electric transformer leh gui ahung kizawp ah a bulb a vak theilo chun thagau hinkhua tawh tekhin in chuh piangthak lo tina ahi mai hi. Ziagual ngei chun Pathian thagau tawh mihiam hinkhua kizawpna a um lo chun thagau vak (piangthak) chanthei hipua’n tin ahinla, I hung kizawp phat leh vak chate I hithei uh ahi. Chun, midang tamtak te’n le I mihiam hinkhua ah thagau vak zal in Pathian lampi, hinna leh lopina hung mu ngei ding ahiu.
Zia mihiam hinkhua ah thagau vak dinmun pawimaw tak hiatchianna ding in tekhinna hawitak vak taklang hitiu. Thaumei chu kuama’n lawnuai ah a kawi ngai puau ah, mun kidaw deu leh sang deu in a kawi sek un khawvel chu a salvak singseng sek ahi. Zia meivak hi ei Christian chate thagau hinkhua dinmun ah kawi in (meivak chu la hi tak ziak in), gamtin ah Christ chanchinpha luangzak saktu leh midang te’n Pathian mel ah ei muthei ta’n tiu in, tichun nungzui tu ding tampi hung um ta ding ahi.
Khaile unaute, khawvel thimtak salvak ding in I Lalpa Pathian chun Ama thupha chuh puangzak di leh hinpi ding ah sawl ah um I hita’u hi. Zia chu supiting ding in, kipan inla thagau thiangtho puina hattak leh hangtak in hun mapui zel chiat ta hen.
*@KL MUANA VAIPHEI*