I GAM LEIPEK SUHING THAK HITIU BY:KL MUANA VAIPHEI
Kanam Vaiphei
KL.MUANA VAIPHEI
I GAM LEIPEK SUHING THAK HITIU
Pathian mapuina tawh tukum 2021 kumbul tha ni lam a la kichai kitta, tuhin Vulte ( March) tha pawimaw tak mai ahung kipat tawh kitawn in gennawp tamlo cha vak enkhawm hitiu. Tu tha March ahin ganhing- gancha te a diak in Vacha te’n suan leh pak ahun nei guau ah, a hung hukpan tau hi. Zia gual Pathian thilguan chu sukpitin ding gua’n aki pawl lim mama sek ui. Chun, Pathian in a thilsiam ganhing leh a dang zosia te’n Siamtu lopi dan mu leh suklat ahizing thei chu pawimaw mama ahi. Zia chuh ahitheina ding in Green Environment, lei chung ah um zosia te mamaw lianpen hih mihiam te bep in siampha thei I hiziak un siamphat hun leh panlak hun ahi. Zia chu nasatak ah I chiapi’u ah khawvel melhawina leh Lalpa Pathian lopi dan sulang ding ah mawpuak na ei piak hi supiting ding in pan I lakchiat uh nawp a um hi.
Khangtak te’n gam leh gua cheimawi thak kit na ding ah pan latu leh san danglam ahitheina ding ah kalsuanna thak a pawimaw takzet ahi. Tu dinmun ah I gam leh gua, khua leh tui, nek leh chak hawlna, leh hun awl I matdan te’u hi etthak kit leh siamthak hun ahi. Maban hun hung chiazel ding ahin I gamsung thusuak buaina te bep buaipi ah kalsuan ahichun I gam leh gua te hawina mangthai thei ding dinmun ah ding I hidan uh iki hiatdawh thak uh pawimaw ahi. Ziakachun, lungthim thak sek dawk ah I gamsung tung ding thak kitna ding in I gam leipek mama siam leh chei thak a ngai hi.
Pathian in ei piak I gam leipek neucha hi a sung ah cheng te’n puathak ah, ngaituana hing tawh nasep ah panlak a hun ta ahi. Guallui hun ah khua leh tui I la matdan enthak kit in thaichi, nek leh chak piansak dan te chiadan hawizaw zil ah mangthei ding in kisiam thak leu hin ut a um mama hi. Tekhinna’n, thingtang lovat dan, mual leh tang pawimaw lo gual ah mawk halthak ziang te haw hi haisan hun ahitai kati nuam hi. Thingtang lo nasep bawl kawmkawm ah a lawk theipen leh a phachuam theipen ah I gam hing diaidiai ah kawizing theina ding dan chiapi thak nei ngai in kamu ahi. Zia chu, a gam ah chengte, hausate leh government lam apat thuneitu te’n kituptak ah panlak khawm a pawimaw takzet hi.
I gamsung hing diaidiai ah umsak kit leh ahithei zing na ding in thing leh gua te vengbit in, tuthak zel leu hin ut um kasa mama hi. Thing leh gua te’n I gam hausakna a supiting thei ah, mihiam te ding in damtheina tawh nek leh chak hawizaw sem a tunsak thei hi. Thing leh gua te enkawl leh sumawitu gamsa leh Vacha te humbit thak pawimaw mama ziang ta ahi. I gamsung nangawn ah thingtanggam ah thing leh gua, Vacha mu ding tawm mama a bei hial dinmun tiang ah kilang ta hih kingaituana kham ting ahi mama tai. Chun, gamsa te dinmun hiat leh et in I gam leipek ua hin manthaina lampi chuh hat mama ta kasa ahi. Ziakachun, sa kap, gu ah nga mat, airgun leh thang ah Vacha mat tite haw hi a thei liai ah haisan ah gam leh gua, khua leh tui te hing diaidiai ah siamthak ding ah mitin in mawpuakna ah nei chiat ding pha kasa mama hi.
Zia achung ah kigen tawmcha thilte hi ngai pawimaw thak in I gam leipek pua thak chiat leu hin khawvel hinna thak khangthak- khangsawn te a ding ah siam hizaw ding I hiu. I Zogam lei paklun sak kitna ding ah kuama mawpuakna ahipua, a sung ah cheng zosia te mawpuakna ahizawi. Ziakachun, hinna nei I gamsung ah um zosia humbitna ding leh hinna thak um theina ding ah lungthim thak tawh panla in, thing leh gua te tung ding thak kit ah, Zolei hausa tak siam in, I gam leipek suhing thak kit hitiu.
