HUN CHIASA LEH MALAM THILLAWKNA
– K L Muana Vaiphei
Malai pi leh pu te chu zalen tak in tu ah India, Bangladesh leh Myanmar kiti gam chuam um diak lo in lim leh lam in nuam tak in hinkhua ala mang uh ahi. Buaina dang tamlo in nek leh chak di ngaitua in mualtin guamtin in ala pem vel ui. Hausa leh siamang te vaihawm dan in khawsa in nek leh dawn, sa leh gal a la do sek ui.
Zia hun nawp leh thangai um tak chu West Bengal apat British sepai leh Christian missionary a hung lut apat in vaihawmna, chindan, nek dan, chawn leh khan tamtak ahung kisang tai. Missionary te zal in thagau lam hinkhua leh thinung khawvel ah kinepna phazaw chu ahun tudet tau hi. Khantona ahia, amabo, chawn leh khan khenkhat leh chindan phalo chi tamtak ahun tu khawm bawk ui.
Zia gual ma chun politics ah India, Myanmar leh Bangladesh ah um te 1947 in international boundaries in ei changtel na um lo hial a thuneitu te’n ei khenzak mai uhi I ngaitua in lungthim chu ana ngawi ngawi ahi. Chi leh nam suan khat tunung ah kigawm thei ding te political boundary ziak ah gam chuam chiat ah kikhenna hi thisan in a hemil lo ahi.
Christian hi Pathian hing leh thiangtho ho leh bia te I hina’u ah khawvel mi te sang ah thiangtho leh ngilneina, hepina, zangaina te nei zaw diak dinga ngai zing I hilai un zia I mawpuakna’u chu subuting zolo deu I bang ui. Mani mimal lungthim ah kua kahi em, siamtu’n bang semdawk ding ah ei guat a diam ti hih ngaitua ah panlak hun ahi.
Khrista thisan (Cross) thil hi theina ziak ah thimlalpa apat chun taksa leh thagau zalen leh Pathian cha chansak leh hitheina chu I chang tau hi. Amabo, thakhat thut ah Christian sakhua diktak ah lut ziang I hiziak un kiziltilna hi tasam deu ahibak in doctrine ah kikhenna a hung um ziak in pankhawp na lam leh thagau lam khualzin na hin I Bible in ei dawidan sang in I niam zawu hi. Khrista thianthona gual ah hindan leh ama chanchinpha puanzakna lam ahin taksapna nei nalai I hidan uh mu ding a um na lai hi.
Tichun, British missionary te kengnung zui ah Christian hinkhua mang te I hizing lai un gam leh nam thu in Manipur south lamkai ah um te’n China leh Kachin state huap sung ah um PHAPIAN khua ah meeting nei in, ZRO chu 1993 kum in a hun phudawk tau hi.
Zia aki pat chu meithal leh volunteer chawmkhawm in nampi sepai di training ahung nei tau ah, amin ding in Zomi Revolutionary Army ahung kiti ahi. Tichun, Zo suan te kigawpkhawm ding lampi siam sung ahin unau kikal ah kihiatthiam lo na tamtak hung tung in, sa leh gal gual ah In leh lo kihal piak leh kitualthana tamtak a hung um in, thankhuk khat ah unau chuamchuam tamtak kivuikhawm in I la sun sek ui.
Zia kisuikhawpkit na ding chu organization tamtak in pan a hun lau hi. Ahinla, I duthusam uh chu ating thei nai puai. Tichun ZORO leh a dangdang te’n UNO ah kigawpkhawp na ding thu tamvei pi ava tang kopi ban un zik thaw in lekha tamvei tak le a pe lut tau hi.
Himaleh, I organisation sung ah kihiatthiam lo na, thunei nawpna te leh pawlam te dawha ziak in pawlpi tup leh ngim nei ah kalsuan lai chu li (4) vei hial (four time faction or mutiny) ala um ta ahi. Zia gual Tapkuang Mentality hi haisan hun ahi kati nuam mama hi.
Aziak leh zal khat chu ahi leh electoral ah lutthuk takluat na hin kikhenna leh buaina ei tun hidan in a lang sek hi. Himaleh, zia election ziak ah buaina siam te hin Nampi maban di leh khangthak te khankhua ding gel lo hial ah amau lalna ding leh phatchuam na di angaitua ziak ua lambuai leh chiabuai zaw I hiu ti hi ka mu dan chu ahi.
Khaile Unaute I gam neisa’u leh luasa’u I chang kit thei na ding in NAMKHANDAL mi himhim tel da mai leu hin I gam leh I saltan na’u apat pawtdawk in Lalpa gamtiam chu Ama zal ah hun nei ngei di I hiu. I gam leh nam, I sepai galkap te puksiat na ding bawl zing ziang te tel dawk ding ah la kiphal na lai em ti hi Nam sepai ngaidan hi ngei ding ahitai.
Gam leh nam hi Lalpa Pathian a ahi. Ei te hi I kituak ah gam neitu lung I hawlchun nam dang te gual in gam hung nei ngei di I hiu. Zia a ding ahin hun tiam chu ngakzo tak ah khangthak te makhua ding siamphawt a ngai hi.
Tuni tiang ah kigawm theilo mimal phatchuamna ngaitua ah I nam Zomi phat san tei tei I um uh chun kigawm khawp kit na ding chu thil haksa ma ma ta di ahi. Zokhandal mang aw…. Zokhandal si aw….
