HEPINA ITIU HI BANG AHEM
– KL Muana Khaute
Mihiam awsua leh I Bible in I zui di hileh thupiak thupen a ei ziltil chu hepina hi ahi. Ahinla, hepina tak zui sang ah a thudan leh mihiam muding a kilawm mai a I zui mai dan un a kilang hi. Achuti ahileh hepina diktak hi a tak umlo, malam ah mihiamte kinepna a taksua um lo, vangam nawpdan leh lopi dan I kineina gual mai ahi diam? Hindu-te ginna MAYA sakhua ki etkawlna mai mihiam I hi sung ah thilpha I sep leh mipha leh mi thupi ah piang dinga kinepna gual mai ahi diam ka ti chang a um hi. Aziak chu kuanma’n Pathian a muthei puan, Greek-te leh philosopher te’n mipi a etkawl theina ding pilna politics mai ahi kha diam ti hin lunggel kanei hi. Aziak chu sakhua zosiate hi Pathian thilhitheina kinepna sakhua thugin zui chiat I hiu.
Sakhua zosia kizilna hi a phalo a um puan, thingam chiat in gin-um tak in a zui un, christian-te sang a thiangtho leh kukal zaw a thugin uh a zui ban un, a hinkhua matdan inle thianthona leh diktakna zui zaw a batna tiang uh a um hi.
Pathian hing leh thiangtho biate le siamkawm pathian betute, hindan, khawsakdan, thianthodan leh thil bangkim ahin Pathian hing leh thiangtho ahina I suklat diu chu ahi. Pathian ni, Good Friday, Palm Sunday leh Christmas I mat ziak ua hin I hinkhua a lamdanna a um diaklo chu liau leh pan tamsak, zia chan di leh taksanlo sa sa zui a kisukbuak sang in, khawvel hi zalen taka I mat uh hin mihiam a ding ah kipakna leh kithiam channa um zaw diam ti chang ka nei hi.
Pathian hing ho leh mi dangte sang a lamdanna I nei ngei di ahi, phatnate, zangainate, hepinate leh genthei liangvaite sawmdawlna te hi hakat ding, khawvel nekguknate, khawsung leh minautangte thianthonate ahin chungnunna I nei ngei di ahi. Tangchung a thaumei chu a vak zing di ahiban in pakcha pak hawi a zu mipi chawpthei ding a I um zing ding I hiu a khawvel salvaktu I hi diu ahi.
Pathian hing leh hote I hiziak un lamdamna I nei diu ahi ahi. Zia lamdanna apat chun gingtute’n Pathian hing holo te’n ei mu leh ei hiat thei diu ahi. Thilsiam zosia lak ah lamdanna I nei uh chun Pathian cha I hinau mi’n hung muntin, Lalpa kiang lam ei zui diu ahi. khaile, mithiangtho Pathian chate I hiziak in khawvel vak hi ding in Lalpa’n ei hithiang tho tahen.
