GAM LEH NAM CHU PATHIAN A AHI
Malai I pi leh pu te’u leh Israel te’u khan puitu ding ah Vaihawmtu a tel hun un chi leh nam siamtu leh a nei tu Pathian dawng in vaihawmna a nei sek ui. Thupitak leh thudik tak ah Vaihawmtu ding ala siam sek maleu mimal vaihawm nawpna ziak in a vaihawmna In te’u leh mipite peikawi tu ding ala kitasam diak lo uh ahi.
Zia gual khawvel ah leng leh khawsa mihiam te I hiu ahi. Siamtu Pathian in a thilsiam te chung ah dik lo tak ah vaihawm ding ah dawisak I hi puau hi. A thilsiam te chawm di leh enkawl ding ah ngansia I hi zawu hi. Ama lungtup gual ah sem te’n a mipite a ding ah khantona leh lawtinna a tunsek un, zia gual ah sem lo te’n mimal hamphatna ding bep a ngaitua un gasua hawilo a um sek hi. Chuleh, siamtu lunglam sepdaw chu leilam leh chunglam malzawlna ahiban in khangthak te a ding ah lawtinna kalbi hawitak le hingei ding ahi. Vaihawmtu dinmun apat in lawtinna leh kiamna khat zawkzawk in lamtua thei ahi. Ziakachun, puitu ding kitelna phawt in Candidate ding ah guanggalna siam te’n Pathian kiang ah kilan masa’n pan la chiat leu chu gasua hawitak um ding in kamu ahi.
I gamsung ah kitelna, teltin inle lawsap inle Pathian lemgel ah lakthei na lungthim a pawimaw hi. Kitelna ahin dawidan kibang lo chiat ahiziak in lawting leh lawsam a um ngai ahi. A lawsam te’n le amau thasang ah puitu dinmun lua thei ah um te chu kipak tak in a lamtua ding uh ahi. A lawting te’n le masang ah hung tung ding zosia mani Liangkawl gual ah pawzo ding in kisa chiat leu lawting ding ahiu. Zia gual ngaituana leh kipiakzaw lunggel a um theilo chun, gam leh nam khanmawbawk hi khak ziang theina ding naicha um in akilang sek ahi. Ziakachun, piting tak ah kalsuan in pan lak chiat pawimaw kasa ahi.
Zia gual achun, tuchung VPC election neina ding ahin lungthim a khawikha mama hi. Malai puitu te kitelna I et chun mipi vaihawmna dik a pawimaw phat leh mithiangtho Zawlnei te mang in Pathian in Puitu ding a puang sek hi. Zia dungzui achun gam leh nam a ding in phatchuam na tamtak a um hi. Himaleh, Pathian zai a ngak zawlo chang un mihiam te lemgelna puitu a tel un, guat ah um puitu te’n le Pathian zai a ngak lo phat uleh lawsapna liantak a um nuam sek hi. Ziakachun, Pathian lemguatna hih bang ahem tizing kawm ah puitu dinmun del leh lua thei ding ah kisak chu pawimaw kasa mama hi.
Puitu dinmun tuk nawpna ziak mai ah kitelna thanuam, mani mimal hinkhua ah titna um lo ah kitelna um thei ahi. Zia gual kitelna chuh um thei ahiziak in mipite thasang ah Vote nei te’n nam nasep nuam taktak te, gam leh nam damna ding leh khantona ding ngaitua kawm in teldan thiam a ngai mama hi. Kitel hun ah kum bangzat hem daiding bawlkhial ziang thei ahiziak in pilvang tak ah tel ding ahi.
Zia chuh ahiziak in lungput neu chacha te nusia in, titna neilo ah vaihawmtu hi teitei ding nawpna taisan ding ahi. Nampi Kuangtawl na ahin gam leh nam ngaina siamphat nuam te a ding in tha leh zung, ngaituana sungkhawm in, kithugual tak ah pankhawmna a pawimaw hi. Khat leh khat kiningnawk tua sang in suachakna ding ah panlak khawm ah sepkhawm chu pawimaw pen in ka kamu ahi.
Nampi kuangtawl na ah vaihawmtu dinmun ah lawchak umsun ala kihekha chu gensiatna, Inchen lochen buai na, leh lunggimna mai ahi zing lai ah, Nampi kitelna ding ah Puitu ding tasam lo ah a um ziak in kipak um kasa mama hi. I Nampi lawting tak ah um theina ding in Puitu te lungput leh lunggel piting a ngai hi. Zia chu nam damna leh bitna le ahi.
K.L.Muana Vaiphei ©19-04-2021
