GAL NEI ZING KAWM AH EIMA KITHUNUN DING : K.L Muana Khaute
![](https://www.kanamvaiphei.com/wp-content/uploads/2023/08/WhatsApp-Image-2023-08-30-at-1.05.30-PM-1024x1024.jpeg)
(A call for spiritual revival and social reformation)
writen by: PHegin Lhungdim @Rs 250/- only available at Jerusalem Clinic
Manipur thingtanggam lak gua ah gal ei siamkhum maleu tuni tiang ahin kuama va do in gal I siamkhum nai puau. Sim gam apat I khawtang khawsak dan tampi kathil vel sek a, bu-leh-bal hau in nunnawp I mat zinglai un, gal in ei nawk a, khua leh tui taisan in gal muanna gam I zuan ui. Khua neu chacha, kikak tak tak ah chengte I hiu a, khua sim (invade) ding ah hung kuante a ding achun bailam leh awlsam mama sim ziang thei ahi.
Tichun, tanggam mun chuam chuam Manipur state sung I dap suak ui. Masanglai ah I thil tuaksa teu apat chengbum kigua diaklo in Manipur tanggam mun chuam chuam luan in, muntin in I kithethang ui. Zia gual chu ahizinglai in kihiathiamlo ziak ah 1997 in unau (Kuki-Zomi) kal ah kidona a la um a, khua kihal tampen leh a thi tampen ah Vaiphei chate I pang ui. Himaleh, Pathian mapuina zal in muthei khawp in a malzawlna I chang ua, I khangto mama uh ahi. Hiziang maleh, Teimei vangkhua lai Imphal ah chenna veng I siam un, sum a crore tel ah lut in Inn I sau a, phaitual achun I la gal muang mama mai ui.
30% discount till 28th Sept 2023
Zia chu ahi zinglai in Meitei/Meetei community in Indian Constitution, Scheduled Tribe list ah Meetei/Meitei pansak ding phutna a bawl dawilo suklatna leh Manipur High Court in March 27, 2023 ah Scheduled Tribe list ah Meetei/Meitei pansakna ding demand chungchang ah Manipur State Government in Centre government kiang ah recommendation poimawte a piak ding ti ah order a sua dawilona ziak ah All Tribal Students’ Union Manipur (ATSUM) malatna 3rd May, 2023 in Manipur hill district- Senapati, Ukhrul, Kangpokpi, Tamenglong, Churachandpur, Chandel, Tengnoupal District headquarters ah Tribal Solidarity March rally a um hi. Zingkallam dak 11:00 in zia rally chu a kipan a, thawveng tak in a kichai hi. Himaleh Meitei volunteer te’n Phougakchao Ikhai Bazar ah counter blockade bawl a, 3rd May, 2023 nitaklam dak 4:00 tuam ah Leisang khua ah um Anglo- Kuki Centenary gate a hung hal ziak un, buaina a hung piang pan a, zia buaina chu sosang in namkal buaina a hung suak hi. Ginchatna khellam in muntin ah um Kuki-Mizo-Hmar-Zomi te chenna mun phawt Manipur sung ah haltum in a um a, thina thisan in ei tuam dimta ahi. Namkal buaina kipat hun ah khua kihal masapen leh attack kibawl masapen chu Vaiphei khua – Kangvai, Torbung ahi. Gal ding ah kuama kiginglo maleh melma mel ah etden in I um ua, hattak in ei do pan tau ahi. Zia gual achun, gal leh sa’n ei bawl tau a, Zosuan te a ding in kivenbitlo theilo ahi tai. Dogal melma nei ut ziak hilo maleh alotheilo dinmun a chantak ziak zawk in hiam leh thal mang in I kisa bem tau hi. Khawvel khankhua hiatphak tiang in khangthu achun kuama tawh kimelmatna umlo in kicham tak in khua leh tui-te siam in khawvel khantona lam zawk I del uh ahi.
Melma nei ziak hilo ah dotu nei ziak vang in dogal I sat ua, gal bawltute tawh I kitekhin chun bangma zat I pha puau. Himaleh, siamtu Pathian zal in tuni tiang humbit in I um ua, pilvang takcha melmate apat zawna I chantheina ding ua I khawsak ding uh ahi. Zia ding achun, I pilvan mama uh a ngai a, pilvanna ding in thil pani a poimaw hi. Khatna’n, melmate I zaw theina ding uh leh gal mun ah I bitna ding un, hotu za dan thiam a poimaw a, nek leh chak lam ah thiantho ding, numei apat kikawi thiantho ding ahi. A panina’n, mani mimal hinkhua kithunun zaw a poimaw a, Pathian suang ah gin-um leh hangsan tak ah panlak a ngai hi.
Ziaziak achun, gal hunlai ah gal do dan thiam a, puitute za dan thiam a, a thianglo him him bawllo a pha, gal kichai hun tak leh maban hinkhua kalsuan ding dan tiang ah panla thei ding ah I hinna kisiamtup a poimaw hi. Chuleh, gal apat zil ding tampi umte lak in khua leh tui siam hun ah a bum ah chenkhawmna ding lunggil ah ngaitua ah supiting ngei ding ah kisak a ngai hi. Achutilo chun, khawvel ah cheng nalai I hiziak un kithethang tak ah chen hin gal zawna umlo ahi ti kichian tak ah a muthei hi.
Chutileh, pankhawmna leh sepkhawmna in malam masawnna ei tut intin, tu leh cha khang tiang ah bitna um ding ahi. Chi leh nam, gam leh gua, khua leh tui chawisang ding leh vengbit ding ah puitu hina ala changte leh nungzuitu te’n vaihawmna inn ah lunggel thiam a, khenzaktu hilo ah gawpkhawmtu hizawkna ding ah Zosuan chate I pan uh le a poimaw hi.