18th April 2022 | Kanam Vaiphei
Famta Thangminjoy Baite in anutsia a Nu leh a Naute kithuapina ding ah sum I tuakkhawm uh chu tuni, 17 April nitaklam dak 2:00 in a piakdawna nei ahi.
CCpur, Red Cross ah um, Khawvaiphei Film Company office mai ah kingak khawm in, nitaklam dak 1:10 tuam in, gari 3 in Boljang vangkhua a kizuan a, tilkhona leh malzawlna dawtpiak ding ah Pastor Mangminthang, Bial Pastor, Dumlian Bial, MPCS chial malam ahi.
Johnson Letpao, General Secretary Zillai Chandel District in Sugnu Bazaar ah eila lamtua in, Inspector B. Lunthang Vaiphei, OC / Sugnu PS inle zia hun matna chu a hun uap hi.
Famta Thangminjoy Baite inn mun ah hun saulo kimang in, Pu Lallunkam@ Kampu Vaiphei, Chief of Mata in kalsuanna ziak genlatna nei in, mun chuamchuam ah um Suali, U-leh- Nau ten le thawkpi ahidan fel tak leh chawmkim chan a gen a, sum tuakkhawm ah um Rs 55,000 leh a tuakkhawm-te list, H. Sangpi, President YVA GHQ in (L) Thangminjoy nu khut ah a piakdawna a nei hi.
Inn neilam leh Boljang hausapu apat thugenna um in, kipak mama a hidan uh a taklang ua, a kalsuan te leh sum tuakkhawm zosia te chung ah kipak takzet ahidan uh a puang ui. Zia gual kalsuanna chung ah unau, thisan khat hina kilang diak sa leh thamuang chuam mama ahidan uh a gen ui.
General Secretary Zillai Chandel District apat thugenna um in, mun gamla tak apat lusuun te delzui, a chiakhawm zosia te Zillai Chandel District sik in pakchat thu a gen hi.
Pastor Mangminthang, Bial Pastor, Dumlian Bial, MPCS in hun mang in, Bible chang pansa in lusuun insung mite tilkhona, thamuanna thu a gen a, thil zosia Pathian lemguat hivek ahidan gen in, lusuun insung mite a ding bak in khawsung mite a ding in malzawl dawt piakna’n pauchapna nei hun matna zaw ahi.
Hun mat zaw in, Inspt. B. Lunthang Vaiphei, OC / Sugnu PS in a kalsuante ama office ah theitui dawnpi in, kimelhiatuana siam ahi.
![](https://www.kanamvaiphei.com/wp-content/uploads/2022/04/compress1650276791294-1024x461.jpg)
Zia zaw a chu, Lamka lam zuan in…….Pu VLK Vaiphei, Dy Commandant, BSF in ama official quarter ah a kalsuan te ding in dinner host a bawl hi.
Zia panlakna chung a, sum hun tuakkhawm zosiate, bank account ei matsaktu Nk Syndy Lamhoi of Saipum, bangkim ah panla, Pu Khamlal of Saipum, gari hun puadok ah a poimawna zosia panlatu, Pu Kampu Vaiphei, Chief of Mata, gari hun puadok le lusuunte vena hung pang, Pu Khuplianmang, Chief of Lingsiphai, gari hun puadok le lusuunte vena hung pang, Pu H. Sangpi, President, YVA GHQ; lusuunte vena hung pang, Pu VLK Vaiphei, Dy Commandant BSF, Pu HS Kailun, Secretary, VPC GHQ, Pu Khupboi, Chief of Bisanmual, Pu Kapbanyan, Ex-President YVA GHQ, Pu Thanglalsiam Suantak, Ex- Gen. Secretary, YVA, GHQ Pu Neneu of S Munnuam, a mun lam ah a poimaw dungzui ah panlatu Inspt. B. Lunthang Vaiphei, OC / Sugnu PS, Pu Samuel D Baite, Zillai Chandel Lawiupate, tilkhona thu leh malzawlna dawtpiak nei Pastor Mangminthang, Dumlian Pastor Bial leh a dangdang zosia te panlakna ziak leh Pathian mapuina zal ah i guanggalnau supiting kawi khat kihi thei ahi ziak un, I kipak a, Pathian I chawihoi ui
Lafel thei khawpmai ui, Pathian in a le tamtak in hun mawlsawm chiat hen…