10th May 2022 | Kanam Vaiphei
(Famta) Dr. Paulunmang Vaiphei hi Upa Pautinlam Vaiphei & Pi Chawngneikim, Kangvai Village te gil ah gà masapen, 28 November, 1963 ni Kangvai khua ala piang ahi. Aneu lài ah a Palian Major (Famta) Lalkai Vaiphei leh a zi Pi Nupuii te nupa’n in acha’u gualin ala enkawl ua, a posting na’u India gam ah khawpi chuam2 ah ala sei lian ahi. Shillong (Meghalaya), Jodhpur (Rajasthan), Chandigarh (Punjab/Haryana) leh Jammu (Jammu & Kashmir) ah te aneu lài ah ala khangto ahi. 1979 kum ah Holy Cross School, Dimapur apat in HSLC 2nd Division in ala pass ah; zia kum mà achun St. Edmund’s College, Shillong ah Pre-University Course (Science) ala sim in, ziachu a pass zo in Regional Medical College (RMC), Lamphelpat, Imphal ah MBBS ahun zil to hi. MBBS ahun zaw phat in Doctor nasepna State Government ah ahun mu ahi. 5th September, 1996 ah Medical Officer appointment ahun mu pan ah; September, 2015 in Senior Medical Officer (Manipur Health Services Grade III) ah Promotion ahun mu to hi. Ziazo achu 1st February, 2022 akhan Senior Medical Officer (Manipur Health Services Grade II) promotion ahun mu to kit hi. Churachandpur District ah District Immunisation Officer, District Family Welfare Officer, ti post pawimaw tak te Government in ahun túk sak ahi. COVID-19 Pandemic ziaka India gam pumpi National Lockdown ahung um zaw ah India Government in Vaccinisation Programme ahun guanggal na ahin, Churachandpur District pumpi ah COVID-19 Vaccination programme leh COVID-19 apat mipi ki-húmbitna leh damna dinga chàwl lo ah, a sún a zàn ah pan là leh sepdi zosia sèm ziang Doctor ahina ah kipezo ma2 ziang ah Government leh mipi hiat ala hi ahi.
Upa Dr. Paulunmang Vaiphei, DFWO/Churachandpur hi Salem Veng, Churachandpur ah ama inn mun ah chèng ahia, tu-leh-tu District Family Welfare Officer (DFWO)/District Immunization Officer (DIO) Churachandpur District ah semzinglai alahi. (Famta) Dr. Paulunmang Vaiphei hi Medical Officer aseppat lài in mun haksa leh doctor tamzaw chia nawplo na mun Henglep, Santing, Thingkeu, Senvon ti haw ahin ala posting ahi. Churachandpur District Hospital ah Blood Bank Officer hina ah nà sem pha tak ahi ziakin District Family Welfare Officer (DFWO) ahun túksak ui. Mipi hiatthei tamtak lak ah pakhat chu, District Immunization Officer (DIO) asep lài in Churachandpur District sung ah COVID-19 vaccine kapna nasatak ah ala lawtin sak hi.
Taksa khawvel ah malzawlna leh lawtinna thupi tak2 leh ki-atpi um tak2 a dawng ah a insung leh a Nam a chawihawi bep hilo in, a gin a Pathian nasep le thanuam, kipezo leh ginum tak in ahun sep ziakin a kikhawpna Kochuam Mizoram Presbyterian Church Synod (MPCS) ah Church Elder (Kochuam Upa) 10 October, 2010 ni’n Ordained ala hi. Kochuam ah Bial Chairman leh Secretary mawpuakna ala paw sek ahia; tuchung a damlo hungkipat hile Kochuam ah Bial Chairman ahina athasuak nadinga Bial Khawmpi ah Valedictory Sermon a bàwl làitak ah pulpit chung apat heart attack ahun tuak ah; doctor ahiziak ah heart attack ahi kigingmaw zing chung in a Sermon a chai tiang apang tho2 nalai ahi. Thagau lam ah ngaitua in Pathian ko na a dawn ahin le Pathian BiakIn ah pulpit chung ah Kochuam ah a mawpuakna paw zo ah achaina Valedictory Sermon a gènzaw ah tuak ahi hi maktak leh thupi tak ahi.
24 April, 2022 zàn 8.30 PM vèl ah heart attack anei hi a severe ma2 mai ah, a doctor seppi ten kin-gang tak ah pan la in District Hospital apuak tun ngàl ziang zaw un, a condition et ah Imphal Heart Institute ah Heart Specialist te tawh kihetua ngàl in, ambulance in puak suk ahi. Imphal Heart Institute ah etkawl ahi nung ah hung pha dawk pan ah hiat ah a um lài in, a condition hi hung fluctuate sek in a condition hi kidney lam hun sukha in, Shija Hospital lam ah SLE Dialysis bàwl dinga 09 May, 2022 ah puak phei ala hi. Dialysis hi zàn 12.30 AM vel ah zaw ahi nung in a vitals haw a stable tai tia lungmuang deu ah akichawl zaw in tuni 10th May, 2022 zingkàl 9.20AM vèl ah a condition hung serious kit in, 9.45 AM vèl ah cardiac arrest ahun tuak ta ahi.
(Famta) Dr. Paulunmang Vaiphei hi mi fel tak mai ala hii. A neulai ale chapang fel leh lekhathiam mi ala hizing hi. A tangvàl nung ale mi thu-awi tak leh Nu leh Pa zà leh thumang tak mai ala hi. A thu-awi ziaka a hinkhua ah a dinmun te hi Pathian malzawlna tawh ala mang to mi ahi. Zi nei cha nei lam inle Pathian malzawlna thupi tak ala dawng ah; insung Pathian ah hàt leh ginna dettak nei ala tung ding ahi. Pathian Thu lam ahin a tangvàl lài apat Bible sim nuam leh Bible thu tamtak hiat nei mi ala hi. Bible vèl tam vei ala simzo ah Biblical knowledge thúk tak nei mi ala hi. Pathian Thagau Thiangtho pàwlna nasatak ah ala dawng mi, a ginna ah dettak ah ding zo mi ginum leh mi thutak suanum tak ahi. Shillong ah AFI Building, Bivar Road ah a Ni Nemzakim leh a Gang Kaihau Vaiphei, IDAS kianga a umlai in Pathian Thagau ah nasatak in khantona ala chang in, ala ki ngaina ma2 ui. Tuni tianga Pathian ah a ginna hi nasatak ah ettawntàk ahi zing hi. Hospital ah ICU ah a kamsuak nunungpen te chu Pathian kianga kipàkthu gendi bep hi ala hi ahi.
Suapi unau pianpi aneite – Pu Khaitinlian, Upa Kaiminthnag leh Pu KaiDavid ahiu. Ú-pa ahina ah anau te tawh kihothei tak leh kithuathei tak, unau ettawntàk tak ala hiu.
A zi Pi Lamneinieng hi tawh 6th April, 1991 ah Kangvai ah Church of God (Full Gospel) BiakIn in Kochuam Dàn Thiangtho in ala kikhutsui ui. A zi Pi Lamneinieng hi Sericulture Department, Government of Manipur ah Gazetted Officer post Inspector (Sericulture) ala sèm ah, November, 2021 ah damtak in ala pension hi. A chate’u numei 3 – (1) Miss Kimthianmuan (Muanpi) – M. Com, (2) Miss Tinglalnei (Neiboi) – B. Sc (Home Sc. Honours) Delhi University & (3) Miss Rita Puilianhoi – MA Final – JNU New Delhi – te ahiu. A chate Pathian Thu leh khawvel lekhathiam zil leh khawsakna lam ah siam piting zo nupa’n kituptak ahiu hi.
Taksa ah dam leh hiselna ngai pawimaw ma2 mi ahi dungzui in a nèk leh dàwn kitup tak ah ki enkawl, physical fitness dinga nisin ah exercise la sek ah workout bàwl zing mi alahi ahi. Zia lampang ahinle (Famta) Dr. Paulunmang Vaiphei hi mi ettawntàk tak mai alahi kit ahi.
Pathian malzawlna lampi tamtak ah ala dawn gual ah a malzawltu a Pathian nasatak ah ging leh ana sèm mi ahi zing lài in, a Siamtu Pathian in ama lopina gam ah ala ko ta hi in, tuni 10th May, 2022 zingkal 9.45 AM vèl in zia mangthài ding khawvel i khualzinna gam apat i kumtuang gam ding Van Khawpi ala zuan ta ahi ! Ama ngèi in akamsua nunung ah ala gèn gual ngèi in Pathian kianga a malzawlna thupi tak (Famta) Dr. Paulunmang Vaiphei ei uh eila piak ziakin kipàkthu lunggil apat in igen uh ahi ! HALLELUIJAH, AMEN !!!🙏🙏🙏
