ELECTION CANDIDATE HUN LEH LAWTIN NUNG
By- KL Muana Vaiphei
Kuale election di phat leh mipi maipha thei tawp in a hawl sek un, mipi’n le sum muna ding, gam leh nam lungsiat in tha leh zung, sum leh pai len lo hial in I seng ah, thi theina ding mun ah ding, liam, a thi le I mu sek ui. Ahi vang in, a hung kai nung phat uh leh gim leh chawl, sum leh pai sengte hi ahung kilet sak nuam ma ma ui.
Lawtinna neite mipite chung ah kipakna (credit) piak sang in amau thil hi theina dan in a ki gen sek ua, zia hi mipite a ding in a na ngawi ngawi sek hi. Government chiadan kituplo ziak in mipite haksatna siamphat theilo tu dinmun ah tam tak umte pansan ah nei leh lam hau ziak mai ah election hat gual ah ki kawi hin chu mipite lungthim a detlo ahi. Gam leh nam a ding ah a sep phat uh I kipakpi lai in mi titak khenkhat in lawtin ahi theina ding ah a In- gap law kha thei hi.
Candidate pawlpi in a support te hi a sum piak un a dailo ziak hilo ah support khat kailo sang ah ti’n a kai theina ding un tha leh zung, sum leh pai, nei sun sunte seng in aki kai sak sek hi. Ahinla, ziate chu hemil in a kai nung ua pawlpi, mimal gim leh chawlna leh senna a ngai sak ngai puau a, zia khellam daih achun election zaw sin leh mimal leh pawlpi buaina a tun khawlaw sek ziak in election term sin leh selection in a ki buai zing sek hi. Zia gual dinmun I palgal kai sek vang un kum 30 (sawmthum) zaw cheng in buaina a hung piang sek hi.
Nampi ngaina pawlpi nasem zawm nuamte chun ki pa damlo ah a sep di development lam hitaleh, I tribal political talk lam hita henlang sum leh pai lam ziang ah le I nam pawlpi a panpi zing diu ahi. Chutilo ah a lal hun sung ua mipite taisan ah amau a di bep semte chun gam leh nam a sukbuai ban un election kit phat leh le a ting zawm a um ngai puai ti hi muthei leh hiat in a um hi.
Kuama hi election ziak ah hausat- Inchen ut ten ten a um diak puai, democracy gam ahia mimal thuneina leh dawitelna ahi amabo, ginum tak ah zuitu leh tawsawttu te chawl tak luatna leh sep tam tak luat ziak in Inchen khawsak buai tam ma ma sek ahi. Mimal lawkna taisan ah muthei leh mutheilo ah kipiak zawna sangtak ah taksa leh ngaituana chawl manlo ah pang tam tak umte ki hiatmaw bawl ah um khate chu term kit tak leh I dogal liantak ki suak sek ahi. Mipite ai- awh ah nasepna hin a huaplian theipen ah panlak ah I puan bukte keklet sak zing a ngai hi.
Khaile, voter te zosia credit piak thiam a ngai ah, ei sung ah sum leh pai sengte, tha leh zung kiphal tak ah pangte zangnadawpna piak taksua leh kam thiam pan in bawl hi sek leh mipite le kipak in tiu in, siamtu Pathian ngeile kipak in tin chuleh I sepna zosia le lamzang di ahi. Ziabanachun, hiat ding ah pawimaw ma ma zia tak apat ah a tawpna ding ah gennawp chuh ahileh development, peace, harmony te mai hin mihiam a kipakna a bukim pua lunggil ah kingainatna tawh lungthim kipakna hin lawtinna dawi um a tu sek ahi.
