Khristian diktakte vân daitui in a chapnô zing in, thagau mangthai tamtak Belamno huang in a puilut sek hi. Amabo, khristian naran te’n a delmang sek uh ahi.
Kum sângni valta chanchinpha nam tinte kiang a gen ding ah ngansia umte hin, khawvel gamthim salvak taleh ki lawm tak ahi. Ahinla, tuni tiang in thagau mangthaite Lalpa huang ah puilut sang in ei ma khristian-te hi pakcha a zu bei gual in, a zuantu a vang ma ma hi. Zia thu ahin khristian-te hi ki velchian thakna di tampi um in ka hia ahi.
Khristian-te biak leh ho hi khawvel leh a sung ah siamtu hi ngal a, milim siamkawm dawi leh kau te’n Lalpa grape huan a nungzui a nei tam zawi, kua thiamlo ahi diam ka ti chang a um sek hi.
Pathian kochuamte châpnô na ding leh vakna ding in thawlawm i nei kham kham i pia, zia beplo achun gam chuam chuam apat panpina le i pia sek ah, semtute nawp tual lenna ding leh biak-in lopitak tak, l khawmpite thupi tak tak ah mat hin, Pathian lemguat leh tup chu a tingna dia aw! ka ti châng a tam hi.
Zia chu ahin kochuam semtute bep hilo ah, nungzui gingtute hi le ki ngaitua hun hi’n ka gel hi. Pathian thuhîng kemtute leh hawm zak tute i hi ngal a, ginglote et ding ah le hindan kilawm a le um zawlo beplo in, ei ma le kipâkna leh kihepina mu ding umlo hial, Pathian thilhitheina le neilo chuleh, midangte sang ah be leh phung lungput khawtang leh gam sung ah chiapi, mît-tiak um mai hin Lalpa thiltup leh guat ah i umna semdawk zo talo a diam ti chang a um sêk hi.
I temple teu hi chu gên ngailo in a lopi thei dan ma ma hi i et leh thuthung lui temple Ja-Jem a ki chei bang ziang ta, ahinla a sung ah kikhawmte a kidem tua disa, Bible chang ah kigensa um ki bang ziang, zia ka mu chang in biak-in le government institutions-te bang ziang in ka mu tai. Awle! Bible in ei ziltil gual ah, biak-in lûlna leh gingtute luldan hi khawvel nam tinte kiang in ni gual ah vak a, thîk hîp thei ah, ginglote hîp thei ding in, Lalpa thagau chun ei umpi zing ta hen.
