DAMSAWT HI MIHIAM TE CHANG TEL AHI
I Bible thiangtho ah kimu Mathusel chu kum tamtak a dam ah, ama khang a hung kichai nung in mihiam te dam kum ding bituk chu kum 150 tuam vel ahi. Ahi’n, Leng David hunlai achun kum 70/80 ati zel hi. Zia khang leh dam hun sung bitiam chu tuni tiang in aki zawitawn nalai ahi. Ziakachun, mihiam te damkum ding hi chawmcha bep sung ahitak ziak in thianthona tawh napha I sep ding un pawimaw na sulang hitiu.
Puitu hihen lah zuitu hiziang leu hinle hiat ding ah phachu ahileh, mihiam te a di’n huntiam a um ah, zia hun chu siamtu lemguat dan zil in mat ding ut a um mama hi. Mihiam te hinkhua hi banggual in hatni hihen ahiloleh basam ni hiziang leh le insung a ding ah, khawtang, kochuam leh nampi a ding ah ginum leh thei na zosia chawllo ah I mat zawm zing ding uh ahi . Himaleh, zia zosia te hi a chang leh lungkiak na ding tamtak a hung um hun a tam mama sek hi. Lungthuai hun inle kunglam chu I del hamham di’u ahi. I thi inle I dam inle ginum tak ah I Pathian leh nam a di’n kipia’n, a sakmin chu khangsawn tiang in daibang cham ding in panthak la in I kilanthak ding uh ahi.
Leng Saul in a sang a sang a that in chuleh David in a sing a sing a that hi ti ziak in Saul chu lungawi lo in David chu tha a nuam hi ti I Bible apat akimu ahi. Zia gual mabawk a chun I khualzin na gam ahin thepna leh daltu a tam in lungawp kai na a tam khawp mai hi. Zia gual daltu tamtak palgal kai na ding ahin Pathian apat pilna chim chu nitin leh huntin in aki pawimaw hi. Ama apat pilna chim tak mulo leh changlo ah um khak ding chu Puitu dinmun a di bik in mihiam pilna mai a chun beidawng um tak hiding ahi.
Khawvel mihiam te zatam lak in mipil, miching leh thiam hunkhawp um ziang maleh lawtinna bukim chu ahi puau hi. I Lalpa Pathian bep hi lawtinna bukim ahi ti hiatmillo ding in kanuam hi. A nam te ei kinung heisan lo na ding in siamtu ah kingak zing ding ahi. Kua hitaleh sakhua puitu ahem, politics ah puitu ahem zosia te hi Pathian apat pilna chim pawimaw ahidan I gamsung dinmun apat akilang hi. Zia gual chuh ahiziak in nam khat ah kisiam Vaiphei chate’n Pathian belthak in khatlawna tawh kisiamthak in Nam I chiapi ding ahi. Zia chu nam bitna leh damna hingei ding ahi.
I hinna te’u Lalpa Pathian ah kinga chiat in, tuiluang kiang ah thingphu hing dipdep gual in A kumtuang lemguat chu taksa leh thagau ah khanglian thei ding ah ngak in I kisuhat thak ding uh ahi. Hattak ah nasem ding in taksa leh thagau thianthona kibulphudet thak a pawimaw hi. Khawvel ah sep leh bawl ding tamtak mawpuakna um ahiziak in taksa a ding ah hawilo chep leh muam, nek leh dawn dam kum suchawm thei te apat iki kawikang ding ahi. Taksa hatna hung kiam in, damtheina a hung kiamtak leh mihiam hinkhua hi basam tak mai a hung hisek ah, damlai hat hunpet in thianthona kihabawl in chi leh nam a ding ah I sem ding ahi.
Ziakachun, damsung chawmcha sung ah gam leh nam Pathian siam enkawltu ding ah mawpuakna kipia hi sep pitin ngei chuh pawimaw kasa mama hi. Siamtu’n mawpuakna ei piak te sem thei ding leh supiting thei ah I um na ding un damsawt hi mihiam te chang tel ahi. Zia te chu sepdaw na ding in Lalpa’n a chi a nam te mitin malzawlna ei pia chiat tahen…
@KL MUANA VAIPHEI