22nd March 2025 | Kanam Vaiphei
ONE-DAY FREE MEDICAL CAMP & HEALTH SEMINAR 2025, CHIANGPI VILLAGE AH ZILLAI GHQ MALATNA AH NEI
Zillai General Headquarters guanggal na nuai ah One-day Free Medical Camp & Health Seminar, Chiangpi khua tuni 21st March 2025 ni’n lawting takin nei ahia, zia hun ahin seminar ah Women’s Hygiene and wellbeing ti thupi mang in Dr. Nemlalsiam Vaiphei in anei hi.
Zia Free Medical Camp & Health Seminar hi Zillai GHQ in Project RAISE nuai ah Chiangpi leh akim vel ah mipi te a ding bîk ah bawl ahi. Zia hun ahin Doctor leh Nurse te kithua in Damtheina tawh kisai mipite hiatding ah pawimaw thupha tam tak gen in mipi chiakhawm te Health checkup bawl in damdawi a thawn ah piak ahiu.
Mipi 400 val ten Zia One-Day Free Medical Camp ahin apang thei ua, a neu a lian a chiakhawm ten a phat Chuampi mama dân uh mipite apat hiatthei ahi. Tuni ah dawmdawi hawm daw ah um zat chu Rs 4 lakhs(Approx) value ahi.
Zillai motto ‘In words and In Deeds’ ti ahi gual in a thu kigen bep hilo ah nasep in le ma akisawn jel theina hi I nam sung ah Zillai ngaina mi tawm ngai tamtakte zal ahi. Zia mitawm ngaite laka tuchung ah Medical camp sukpitin na ding ah pan hung latu te Zia anuai ate hi ahiu.
Damdawi athawn ah piatu te
1. Pu Mangcha mangcha (Mangcha medicos).
2. James pharmacy.
3. CMO Office/Medical store, District Hospital.
Doctor leh Nurse gim leh chawl khawksa lo ah hung pangte
Doctors
Dr. Tinglalsiam Rivka Khaute
Dr. Nemlalsiam Vaiphei
Dr. Hoinemkim
Dr. Kevin
Dr. Job
Dr. Lawrence
Dr. Jerry
Dr. Thangboilal
Nurse
Sis. Olivia
Sis. Fefel
Sis. Margaret
Chun, Tuni Free Medical Camp i nei na ahin ei thanawppi ah gim leh chawl khawksa lo in mani hekna ngei tawh Pu Dr. Lamkhogen, Chairman, Zillai Welfare committee in ahung uap thei ah Kipâk thu igen ahi. Chuleh, tha leh jung senna ding zosia hi Chongkhozo block ten ei malat piak ban ua, nitak lam ah nek leh chak tuitak ei nek sak ziak un le kipakthu i gen uh ahi.
Guanggalna chu mihing apat ahia himaleh lawtinna ahileh Pathian apat ahi ti ahi gual in ei lawting saktu Pathian kiang in Kipâkthu i gen ua, Gim leh chawl khawk sa lo ah Pan ei lakpi tu te haw zosia kiangin le Kipâk thu igen uh ahi. Abîk takin Damdawi a thawn ah panpitute, Doctor leh nurse tawm ngaitak ah kal suante zosia chung in Kipâkna a sang mama ziang ah, amau chungin le Zillai min in lunggiltakin Kipâkthu igen uh ahi. Pathian in amau pui in panpi ngaite panpi zing thei ding in i Dawisaknau ilan uh ahi.
Atawppen in, Zillai ngaina ah I namsung khanto zel na ding ah Pauchapna ala pangtu mipite zosia chung inle Kipâk thu ka hung gen sawn sawn nalai uh ahi.
Zillai Damsawt in masawnzel ta hen!
General Secretary/-
Zillai General Headquarters
