BEIDAWN LEH LUNGKHAM HUN AH KIPAKNA CHUH LALPA I PATHIAN AHI.
” Inei, ilam, ichit leh I thiamna te sang in, I taksa, I hinna chuleh I thagau ah lulzo ahi”.
🌹Bible changtel: Habakkuk 3: 17-19.
✍️
Aziktu: Pu Ginlalthuam
Lalgin Inn
Mualngat Innpi
Khualzinna gam
Land of pilgrimage.
☦️
Khawvel ah mihiamte hih i hung piantil apat ngawnchang mai in ihung piang ua, tichun, ihung seilian ua, nêi leh lâm, inn leh lou, gam leh guah gothil hawitak tak, liantak tak te ihung lamdawk ua, ziah khel achun thiamna chitnate sangtak tak ihung muh/i nei uah, ziah ah chun lung-awina aum diam ? Ti’in, mihiam in lungawina i hawl ua maleh i lung-awi thei diak puau ah, ziah gual mai ah chun hinkhua mangzing, mihingte chuh ihiu ahi. Khawvel ah thil umte hi, Bible in bangma lomai mai ahi a tichuh adik tak zet ahi. Bangmalo mai mai ngaina tu mihingte ihiu ahi.
Ka khua, ka inn, ka lou, ka gam, ka nêi leh ka lâm, ka thiamna leh ka chitna te ti’a, i kinei sak/iki letsakpi changbang ala um kha sek, himaleh ei â ala hilo dan tak chuh tuchung i gaal tuak nau apat hin le hiatchian thei chuh ahi.
I nêi ilâm zosia hih ei ma â aum puai, a neitu dik tak aum ahi. Ziah chuh, lei leh vân siamtu Hatchungnung, Lalpa Pathian â ahizawh ngal ah, mihingte ei kawlsak mai mai ahi.
Lalpa’n, ei kawlsak ah, ei lak piak kit mai ahi ti’in, lungthim kithamuan tuahna mailo ngalchuh I bawl thei uh aum tapuai.
Unau, tuni’n kingaituah hitiu, I nêi leh I lâm teu leh ithiamna, chitna te hih kêi â, nang â, timaleu hin uhle a neitu Lalpa thuh thu ahi ei vei, Lalpa isuk lungdam lo ahile kêi â hizinglaipi chule nang â hiziang thei, khawvel ah thil um zosia hih kisak theipi ding pakhat chale aum puai e. I thiphat takleh bangkim chuh ah kichai ahimai tah ahi.
Tuchung I gaal ziak ua I nêi leh I lâm teu, mihingte hinna it umtâk tak, chuleh pu-go, pa-go tamtak ila khawlkhawm sateu nithum kal ah a manthai ziangpi hih, i vak ngaitua dit det ahile khangkhat ale i lamdawh zawtak loding uh a mangthai mai hi…… A mak in alamdang itilo thei puai maw !
Maleh Lalpa Pathian in I chung ah a dawikhat aum ahi, ziachuh, I thagau damna ding hih ahi……!
Tuni tiang ah adamna lai te hin I nêi leh I lâm teu sang in eima taksa hinna leh thagau hi Lalpa’n a dawina ziak khat um ahi diam ?
Tihi gello theilo khat ahung suak ta hilam !
Unau, vak ngaituah kit him him tia……!
I nêi i lam zosia chan hial khawp ah lûbûk ila zampi hun lai ah i hinna tiang eila hukdawh piaktu, Lalpa Pathian chuh pak ah chawihawi lotheilo ahi ti hi, I geldawk zing nau maw….!
Lalpa’n I taksa leh I thagau a dawina ziak khat aum ah a hidiah aw…. I hinna ei hukdawh piak naklai hi, I buaina leh i beidawn hun ah I kithah muan tuah theina ding leh I kipak zingthei na ding in ziah ah nuai a Bible changtel hih vaksim tiam hitiu aw:
Ch.17. Theichang kung selthak lo in, Oliv thing ten gaa sua lo in, lou lai a bu piang lo in, gan gualte chule ahuang ah um talo in, gan kûl achun bawng hawn pakhat chale umtalo ziang maleh
Ch. 18. Lalpa achun kipak zing ingka tin; ka hukdamna Pathian achun kipak zing ingka.
Ch. 19. Lalpa Pathian chuh ka hatna ahi, aman ka kengte hih Sazuk keng gual in a siam ah, tangsang tak ah chiah thei ding in ei siam ahi.
Ahi, I nêi I lâm, ithiamna, ichitna te sang in I hinna leh I thagau Lalpa’n a it tak zet ahi, Lalpa achun kipak zingthei ding in I umna mun chiat un, haksa in genthei umma ma ziang lehle Lalpa adin hingzing thei chiat ding in I lungngaihna, i thavaina, I beidawnna, I lungkhamna te ama’n, I khankhua ding eilel piak zing ding ahi.
I khawsak na mun chiat un damvawng vawng mai hitiu aw !
Lalpa’n, athu malsawm ta hen…… AMEN.🛐
